ԵՐԵՎԱՆ, 25 հոկտեմբերի — Sputnik, Արմենուհի Մխոյան. Miss Intercontinental մրցույթի կազմակերպիչ Դետլիֆ Թուրսիսը հայ գեղեցկուհի Լիլիթ Մարտիրոսյանի հետ հայկական եռագույնն է ծածանել Շրի Լանկայում, աշխարհի հրաշալիքներից մեկը համարվող Սիգիրիա բերդի վրա:
Հոկտեմբերի 3-18-ն անցկացված Miss Intercontinental 2016-ի շրջանակում տարբեր մրցույթներ են կազմակերպվել, որոնցից ամենակարևորը մրցույթի գլխավոր հովանավոր՝ խնամքի պարագաներ արտադրող ընկերության անցկացրած մրցույթն էր. աշխարհի 63 երկրի ներկայացուցիչների շարքում Հայաստանը ներկայացնող մասնակիցն առանձնացել է իր գեղեցիկ, առողջ ու խնամված մաշկով, և մրցույթի պաշտոնական հովանավորն ընտրել է ամենալավ մաշկ ունեցող մասնակցին՝ Լիլիթ Մարտիրոսյանին։
«Միայն բնությունն ու գենետիկան չէ, որի շնորհիվ մաշկս լավագույն գնահատականի արժանացավ, այլ` ճիշտ խնամքի»,- ասաց Լիլիթը:
1988 թվականի երկրաշարժի փլատակներից հրաշքով փրկված գյումրեցի գեղեցկուհին Miss Intercontinental մրցույթի ժամանակ գեղեցկության մրցույթների վերլուծությամբ զբաղվող Missosology ընկերության ֆավորիտներից էր և պարբերաբար հայտնվում էր ընկերության լուսանկարներում, իսկ արդյունքում առաջարկներ ստացավ Վիեննայի, Նյու Յորքի և Շրի Լանկայի տարբեր մոդելային գործակալություններից:
«Բավական բարդ էր՝ 12 ժամ բարձրակրունկներով ու միշտ կատարյալ վիճակում, բայց արդյունքում` անսպասելի առաջարկներ, որոնք անչափ կարևոր են ոչ միայն անձամբ իմ համար, այլ ընդհանրապես աշխարհում հայկական գեղեցկության գնահատման չափանիշների բարձրացման տեսանկյունից: Մրցույթի մասնակցության հայտ էր ներկայացրել 65 երկիր, սակայն մրցույթի խիստ պահանջների պատճառով մասնակիցներից 2-ը որակազրկվել էին»,- խոսելով մրցույթի դժվարությունների մասին` նշեց Լիլիթը:
Ի դեպ, այս մրցույթին Հայաստանի ներկայացուցիչը ոչ միայն աչքի է ընկել իր կատարյալ մաշկով ու մազերով, այլ նաև` իր հասակով. նա 63 մասնակցից ամենաբարձրահասակն է եղել`1 մետր 81 սմ:
Հայ գեղեցկուհի Լիլիթ Մարտիրոսյանը մեծ ցանկություն է ունեցել Miss Intercontinental-2016 գեղեցկության մրցույթի շրջանակում անցկացվող խոհարարական մրցույթի ժամանակ բոլորին զարմացնել հայկական ավանդական ուտեստով` խաղողի տոլմայով, սակայն համապատասխան բաղադրիչներ չգտնելու պատճառով՝ հիացրել է սնկով պատրաստած ճաշատեսակով: «Խոհանոցային մարտահրավեր» մրցույթի ակտիվ մասնակցության և ստեղծագործ մտահաղացման համար նա արժանացել է շնորհակալագրի:
Ըստ ժյուրիի որոշման՝ տարվա «Miss Intercontinental 2016»-ի հաղթող է ճանաչվել Պուերտո Ռիկոյի ներկայացուցիչը՝ 19-ամյա Հեյլիմար Ռոսարիոն:
Լիլիթ Մարտիրոսյանը ինչպես նախորդ՝ «Միսս երկրագունդ 2015»-ին, այսպես էլ այս անգամ, մրցույթին ներկայացել է «Համաշխարհային գեղեցկության և նորաձևության լիգան» նախագահ Աշոտ Խաչատրյանի նախաձեռնությամբ: Լիլիթը Miss Intercontinental —2016-ին հանդես էր եկել Ջուլի Խանջյանի և Գայանե Մարտիրոսյանի դիզայներական զգեստներով և գյումրեցի դիզայներ Անուշիկ Սարոյանի լողազգեստներով, իսկ տարազը տրամադրել էր «Տերյան» մշակույթի կենտրոնը (Լիլիթ Մելիքյան): Մրցույթի ժամանակ Լիլիթը կրել է դիզայներ Գայանե Մարտիրոսյանի զարդերը:
