Անի Լիպարիտյան, Sputnik.
«Մայր Հայաստան» զինվորական թանգարանի շինարարության ժամանակ շենքի ստորին հարկում կառուցվել է սրահ: Թանգարանի բացումից հետո որոշում է կայացվել այն վերածել Փառքի սրահի:
Սև գրանիտով պատված Փառքի սրահի պատերն իրենց անուններով անմահացրել են Խորհրդային Միության հերոսները և Փառքի շքանշանի ասպետները, իսկ Հիշողությունների մատյանում հավաքվել են զոհվածների և անհետ կորած զինվորների անունները: Ինչպես պատմեց Sputnik Արմենիային թանգարանի ֆոնդապահ Լիլյա Անտոնյանը, այստեղ շուրջ 118 հոգու անուն կա:
«Մենք ինքներս հայերենով կամ ռուսերենով ավելացրել ենք նրանց անունները, ովքեր մահացել են Հայրենական մեծ պատերազմի տարիներին: Պատերից մեկի վրա նշված են հայկական դիվիզիաների զինվորների անունները՝ նրանց համարներով: Այստեղ կա 27 զինվորի անուն, որոնք պարգևատրվել են Փառքի շքանշանով»,- ասաց Անտոնյանը:
Նրա խոսքով՝ Հայրենական մեծ պատերազմին նվիրված ոչ մի թանգարանում նման սրահ չկա: Առաջին անգամ թանգարան այցելող մարդիկ հիանում են և զարմանում:
«Ես անձամբ խորհրդային տարիներին հաճախել եմ այդպիսի թանգարաններ, բայց ոչ մի տեղ նման բան չեմ տեսել: Պատին կարելի է տեսնել մեկ կամ երկու աստղ: Երկուսը նշանակում է, որ զինվորը չի մահացել և պատերազմից հետո վերադարձել է տուն: Մեկ աստղը նշանակում է, որ նա ստացել է ԽՍՀՄ հերոսի շքանշան», — ասաց Sputnik Արմենիայի զրուցակիցը:
Նա հավելեց, որ խորհրդային տարիներին որոշում է կայացվել թանգարանի հատակին թուր և վահան դնել՝ որպես Խորհրդային Միության խորհրդանիշներ:
«Թուրն ու վահանը թողել են այստեղ՝ ի նշան հաղթանակի: Ըստ մտահաղացման, եթե դրանք նորից անհրաժեշտ լինեն, ապա զինվորները կրկին կգնան մարտի դաշտ», — ասաց Անտոնյանը:
Սրահի ոչ մեծ գմբեթի տակ օղակ կա՝ զարդարված դափնեպսակով, որը խորհրդանշում է հաղթանակը:
«Մի ժամանակ մենք պսակի կենտրոնում գտնվող աստղի մեջ ջուր ենք լցրել, և այդտեղից ջուրը կաթացել է հենց վահանի վրա: Դա խորհրդանշում է զինվորի և իրենց մտերիմներին պատերազմում կորցրած հարազատների արցունքը»,- պատմեց Անտոնյանը:
Սրահում կան նաև հաստ գրքեր: Թանգարանի գիտաշխատողները մի քանի տարի շարունակ հավաքել են անհետ կորած զինվորների անունները և հավերժացրել դրանք այդ գրքի էջերում:
