ԵՐԵՎԱՆ, 2 նոյեմբերի-Sputnik. Գազի գինը չի նվազելու, պարզապես որոշ մարդկանց փոխարեն վճարելու է պետությունը։ Փոխվում է վճարողը, ոչ թե գինը: Այսօր ԱԺ-ում հայտարարեց ԱԺ «Հայ ազգային կոնգրես» խմբակցության քարտուղար Արամ Մանուկյանը` հիշեցնելով, որ տարբերակված սակագնի կիրառումը լինելու է պետական բյուջեի միջոցների հաշվին:
«Այսինքն` մեր մուծած գումարների մի մասը գնալու է այն շերտերին, որոնց համար պետք է տեղի ունենա գազի գնի իջեցում: Գազի գնի իրական իջեցում՝ սակագինը հաշվող կոմպոնենտների հաշվին, չկա»,-ասաց պատգամավորը:
Ընդդիմադիր պատգամավորը լավատեսորեն չի տրամադրված նաև անապահով խավերին աշխատանքի և սոցիալական հարցերի նախարարի խոստացած ծրագրերի նկատմամբ, որոնց հաշվին կառավարությունը փորձելու է թեթևացնել սոցիալական բեռը:
Բանն այն է, որ 2017թ-ի բյուջեի նախագծում Արամ Մանուկյանը տնտեսական աշխուժության հիմքեր չի տեսնում, որոնց հաշվին պետք է ավելանան մուտքերն ու եկամուտները:
«Եկամուտները լինում են հարկերից, ներդրումներից, տրանսֆերտներից, ծրագրերի իրականացումից: Սրանցից ոչ մեկը չկա։ Արտադրություն և ներդրումներ, զարգացում տնտեսական ոլորտում, որը կարող էր կարճ ժամանակում գումար բերել՝ դա էլ չկա»,- ասաց Արամ Մանուկյանը` հավելելով, որ նման իրավիճակում կենսաթոշակների կամ նպաստների ավելացումը ֆիզիկապես հնարավոր չէ:
