Հայ-իտալական համատեղ անձավագիտական արշավախումբը Վայոց Ձորի կարստային քարանձավներից մեկում պատահաբար հայտնաբերել է հնագույն ժայռանկարներ: Հայտնաբերված ժայռանկարում երկու կենդանու պատկեր է: Բնական պրոցեսների հետևանքով նկարները վատ են պահպանվել, բայց, մասնագետների խոսքով, վկայում են, որ Հայաստանի տարածքի կարստային քարանձավների պատերը մարդու համար նույնպես հանդիսացել են յուրօրինակ կտավ՝ սեփական աշխարհընկալումն արտացոլելու համար:
Արշավախմբի մասնակից, ԵՊՀ աշխարհագրության և երկրաբանության ֆակուլտետի դասախոս Սմբատ Դավթյանը Sputnik Արմենիայի հետ զրույցում պատմեց, որ բնական պրոցեսների հետևանքով նկարները թեև վատ են պահպանվել, բայց դրանց հայտնագործության մասին արդեն իսկ հրապարակումներ են եղել արտերկրի գիտական ամսագրերում:
Նա նշել է, որ աշխարհում արդեն գիտեն այդ մասին, բայց մենք չգիտենք, և հավելել է, որ հաջորդ տարի իտալացի մասնագետները մտադիր են դարձյալ վերադառնալ ավելի մեծ խմբով ու ավելի մանրամասն ուսումնասիրություններ կատարել հայաստանյան քարանձավներում:
Աշխարհի տասնյակ երկրներում քարանձավագիտական աշխատանքներ իրականացրած, Իտալիայի Ռագուզայի անձավագիտական-հիդրոերկրաբանական կենտրոնի և Հուբլեյան անձավագիտական դպրոցի տնօրեն Ռոզարիո Ռոջերին, հայաստանյան քարանձավները տեսնելուց հետո, դրանք իր ֆեյսբուքյան էջում կոչել է ֆանտաստիկ աշխարհ:
