ԵՐԵՎԱՆ, 10 նոյեմբերի — Sputnik. Զինապարտ քաղաքացիների անձնագրում օտարերկրյա պետությունում վավերականության նշում կատարելու դեպքում զինվորական գրքույկ կամ զինհաշվառումը հավաստող այլ փաստաթուղթ պահանջվում է մինչև անձի 35 տարին լրանալը: Այս մասին գրել է Մնացական Բիչախչյանը։
Նա նշել է, որ անհրաժեշտ է իմանալ նաև հետևյալը` այն դեպքում, երբ անձը առողջական խնդիրների պատճառով ունի տարկետում և վերազննման նշանակման օրը մինչև 27 տարին լրանալն է, վավերականության նշումը կատարվում է տարկետման ժամկետով:
Այն դեպքում, երբ հերթական վերազննում անցնելու օրը 27 տարեկանից բարձր է, վավերականության նշում կատարվում է անձի ցանկությամբ, առանց սահմանափակման՝ մինչև 5 տարի ժամկետով:
Այն դեպքում, երբ վերը նշված գործողության համար դիմում է 27 տարին լրացած անձը, ով չի անցել մինչև 27 տարին լրանալը նշանակված վերազննումը, վավերականության նշում չի կատարվում: Առաջարկվում է դիմել զինվորական կոմիսարիատ, իր վրա դրված պարտականությունը կատարելու համար:
Իսկ եթե անձը պահեստազորի սպա է և հերթական վերազննման նշանակման օրը նշանակված է նրա մինչև 35 տարին լրանալը, վավերականության նշումը կատարվում է նշված ժամկետով:
