ԵՐԵՎԱՆ, 14 նոյեմբերի — Sputnik. Երևանի մետրոպոլիտենում պայթյուն տեղի չի ունեցել, Sputnik Արմենիային հայտնեց Կ. Դեմիրճյանի անվան մետրոպոլիտենի մամուլի խոսնակ Նինել Վարդանյանը` մեկնաբանելով նախօրեին մամուլում հայտնված տեղեկատվությունը։
Նախօրեին տեղեկություն էր տարածվել, որ պայթյուն է եղել Երևանի մետրոպոլիտենի «Գործարանային» կանգառում՝ վագոններից մեկում:
«Տեղի է ունեցել տեխնիկական անսարքություն. մալուխի թույլ միացում է եղել, մալուխն այրվել է, փոքրիկ պայթյունանման բան է տեղի ունեցել։ Ամեն ինչ արագ շտկվել է»,- ասաց մամուլի խոսնակը։
Ըստ Վարդանյանի` դա եղել է ոչ թե վագոնի մեջ, այլ դրսի կողմից։
Երևանի մետրոպոլիտենը հիմնադրվել է 1981թ.-ի մարտի 7-ին, այդ օրը շահագործման է հանձնվել 5 կայարան։ Այսօրվա դրությամբ մետրոպոլիտենն ունի 10 կայարան, երկաթգծերի երկարությունը կազմում է 12,1 կմ, սպասարկվում է 45 վագոն։