ԵՐԵՎԱՆ, 15 նոյեմբերի — Sputnik. Հայաստանի քաղաքացի Արմեն Մարտիրոսյանի գործն Ուկրաինայի անվտանգության ծառայության դեմ կքննարկվի Կիևի վարչական դատարանում 2017 թ.-ի հունվարի 26-ին, այդ մասին Մարտիրոսյանը գրել է իր ֆեսբուքյան էջում։
Ավելի վաղ ՈՒԱԾ-ում հայտարարել են, որ Մարտիրոսյանին հանել են չվերթից, քանի որ նրան կասկածել են երկրում իրավիճակի ապակայունացման հետ կապված որոշակի գործողություններում մասնակցություն ունենալու մեջ։ Մասնավորապես, ՈՒԱԾ-ում կարծում են, որ նա կապեր է հաստատել դրանում ներգրավված քաղաքական շարժումների և կազմակերպությունների հետ։
«Կիևի շրջանային դատարանը քրեական գործ է հարուցել Ուկրաինայի անվտանգության ծառայության դեմ Արմեն Մարտիրոսյանի հայցով «Բելավիա» ավիաընկերության ինքնաթիռը Կիևի օդանավակայան վերադարձնելիս նրա գործողություններն անօրինական ճանաչելու մասին։ Դատական նիստը նշանակված է հունվարի 26-ին»,- գրել է Մարտիրոսյանը։
Կիև-Մինսկ չվերթն իրականացնող «Բելավիա» ավիաընկերության ինքնաթիռը հոկտեմբերի 21-ին ստիպված է եղել վերադառնալ Կիևի օդանավակայան, քանի որ ուկրաինական իշխանությունները սպառնացել են կործանիչներ բարձրացնել ինքնաթիռում գտնվող «հակամայդանցի» Արմեն Մարտիրոսյանի պատճառով:
Վայրէջքից հետո Ուկրաինայի իրավապահ մարմինները չվերթից հանել են Հայաստանի քաղաքացուն: Բելառուսի ԱԳՆ-ն արդեն բողոքի նոտա է հղել Ուկրաինային՝ Կիևում բելառուսական ինքնաթիռի հարկադրված վայրէջքի համար:
Ինչպես նշել է Ուկրաինայի Անվտանգության ծառայության աշխատակիցը, գերատեսչությունը տեղեկություն է ստացել, որ Կիև-Մինսկ չվերթն իրականացնող ինքնաթիռում օտարերկրյա քաղաքացի կա, որը կարող է սպառնալիք ներկայացնել ազգային անվտանգությանը:
