ԵՐԵՎԱՆ, 28 նոյեմբերի — Sputnik. ՀՀ վարչապետ Կարեն Կարապետյանը պաշտոնը ստանձնելուց հետո բարձրաստիճան պաշտոնատար անձանց էթիկայի հանձնաժողովին հայտարարագիր է ներկայացրել, որում մանրամասներ են նշված նրա ունեցվածքի վերաբերյալ:
Անշարժ գույքի բաժնում Կարապետյանը հայտարարագրել է 4 բնակարան, մեկ ամառանոց: Պաշտոնը ստանձնելու օրվա դրությամբ նա հայտարարագրել է 50 միլիոն ՀՀ դրամի արժեթղթեր:
Պաշտոնը ստանձնելիս վարչապետի դրամական միջոցները կազմել են 3 մլն 700 հազար ԱՄՆ դոլար, 850 հազար եվրո, 120 մլն ՀՀ դրամ, 55 մլն ռուսական ռուբլի:
Կարեն Կարապետյանի` պաշտոնը ստանձնելու տարվա հունվարի 1-ից մինչև պաշտոնական պարտականությունները ստանձնելու օրը (13.09.2016) աշխատավարձից ստացած եկամուտը կազմում է 70 մլն 850 հազար ռուսական ռուբլի, այլ եկամուտները՝ 32 մլն 898 հազ դրամ:
Ընդհանուր եկամուտը կազմում է 32 մլն 898 հազ դրամ և 70 մլն 850 հազար ռուսական ռուբլի:
Ըստ հայտարարագրի` Կարապետյանն ունի LEXUS LX 470 և TOYOTA LAND CRUISER 100 մակնիշի ավտոմեքենաներ և 8 մլն դրամը գերազանցող ձեռքի 3 ժամացույց:
Վարչապետի ընտանիքի անդամների՝ պաշտոններ զբաղեցնելու վերաբերյալ տվյալներ չեն ներկայացվել:
