ԵՐԵՎԱՆ, 6 դեկտեմբերի — Sputnik. Զապորոժյեի շրջանի գեղարվեստական թանգարանում կբացվի հայ նկարիչների աշխատանքների ցուցահանդես` նվիրված Հայաստանում երկրաշարժի 28-րդ տարելիցին, հաղորդում է Ուկրաինայի հայերի միության կայքը` հղում անելով միջոցառման կազմակերպիչներին։
Ցուցադրությունը ներառում է 16 ճանաչված հայ նկարչի կտավներ, այդ թվում՝ գեղանկարչության այնպիսի վարպետների, ինչպիսիք են Ռուդոլֆ Հակոբյանը, Գագիկ Կուղինյանը, Գայանե Առուշանյանը և Մարիանա Սմբատյանը։ Թանգարանի արխիվում երկար ժամանակ պահված նկարներն առաջին անգամ կներկայացվեն հանդիսատեսի դատին։
Ուկրաինայի հայերի միության մամուլի ծառայության հաղորդագրության համաձայն, Հայաստանում երկրաշարժի տարելիցին նվիրված միջոցառումներ տեղի կունենան նաև Ուկրաինայի այլ շրջաններում։ Ցուցահանդեսը կգործի 2016 թ.-ի դեկտեմբերի 7-17-ը։