ԵՐԵՎԱՆ, 7 դեկտեմբերի — Sputnik. ԱԺ պատգամավոր Ռուբիկ Հակոբյանն այսօր ԱԺ-ում հայհոյել ու հարվածել է hraparak.am-ի լրագրող Վահե Մակարյանին: Նման հայտարարություն է արել լրագրողը` նշելով, որ պատգամավորն իրեն հրավիրել է առանձին զրույցի, որի ընթացքում էլ, բոլորի աչքից հեռու, հարվածել է իրեն:
«Ես Ռուբիկ Հակոբյանին Դաշնակցության գաղափարական գծի մասին հարցրեցի»,-միջադեպի իր վարկածը ներկայացրեց լրագրողը` հավելելով, որ պատգամավորին զայրացրել էր այդ հարցը:
Պատգամավորն առաջարկել է առանձնանալ, և երբ ոչ ոք չի եղել, պատգամավորն անսպասելի հարվածել է իրեն:
Ռուբիկ Հակոբյանը միջադեպը մեկնաբանելով նշեց, որ Վահե Մակարյանն իրեն խուլիգանի նման է պահել:
«Հարցազրույցի ժամանակ լարվածություն կար: Նա ասաց՝ էթիկայի կանոններն եք խախտում, ես ձեզ կդաստիարակեմ: Այդ ժամանակ հասկացա, որ լրագրողի հետ չեմ զրույցում, այլ՝ պարզագույն խուլիգանի»,- ասաց պատգամավորը` հստակ չնշելով, սակայն, հարվածե՞լ է լրագրողին, թե ոչ:
