ԵՐԵՎԱՆ, 7 դեկտեմբերի — Sputnik. Արմենուհի Մխոյան. Վարչապետը վստահեցրեց՝ ՀՀ կառավարությունից աջակցություն կստանան այն գաղափարները, որոնք իրատեսական են ու օգուտ կբերեն քաղաքին:
«Մենք գումար ենք ծախսելու, բայց գաղափարը պետք է նպաստի քաղաքի զարգացմանը »,-նշեց Կարեն Կարապետյանը:
Բիզնեսի համար հետաքրքիր գաղափարը պետք է նաև հատուկ միջավայր ունենա, այդ պարագայում Գյումրու քաղաքապետը խոստացավ օգնել:
Այն, որ Գյումրին հնարավոր է զարգացնել զբոսաշրջության ուղղությամբ, Կարեն Կարապատյանը համոզված է՝ նախադրյալներ կան, իսկ երիտասարդության ուժը թարմ գաղափարներով կնպաստի դրան:
Լսելով որոշ առաջարկներ ու հարցեր՝ վարչապետը հավաստեց. «Ես ավելի շատ քաղաքի զարգացումը կապում եմ ձեր հետ, քան որևէ չինովնիկի»:
Այն, որ Գյումրին ֆանտաստիկ քաղաք է զբոսաշրջության զարգացման համար՝ վարչապետը նշեց նաև մարզի համայնքների ղեկավարների, տարբեր ոլորտների ներկայացուցիչների հետ ունեցած հանդիպման ժամանակ:
Խնդիրներ կան արդյունաբերության, քաղաքաշինության, մշակույթի և գյուղատնտեսության բնագավառներում։ Այդ մասին ոլորտների ներկայացուցիչներն ու համայնքների ղեկավարներն իրենք բարձրաձայնեցին, իսկ կրթության ու առողջապահության համակարգերում հնարավոր խնդիրների մասին անձամբ վարչապետը խոսեց:
Կարեն Կարապետյանը նշեց, որ անելիքներ կան, սակայն դրանք պետք է համակարգված բոլորի կողմից իրականացվեն:
«Մեր բոլորիս քայլերը պետք է կառուցվեն մեկ գաղափարի շուրջ, յուրաքանչյուրիս գործն է՝ մեր երկիրը, մեր քաղաքը փոխել, և դրա նախաձեռնությունը պետք է ծնվի այստեղից»,-նշեց Կարեն Կարապետյանը:
Հանդիպման ընթացքում հնչած առաջարկները և հարցերը վարչապետը հանձնարարեց ներկայացնել համապատասխան գերատեսչությանը՝ այն վստահությամբ, որ դրանք կքննարկվեն, իսկ լավագույնները կառավարության աջակցությունը կստանան:
Նշենք, որ մինչ այդ հանդիպումը Կարեն Կարապետյանը եղավ Ախուրյանում, ծանոթացավ Ախուրյանում իրականացրած շինարարության ու նորակառույց բնակելիների վիճակին, իսկ առավոտյան՝ 11:41 րոպեին՝ հենց այն նույն ժամին, երբ տեղի է ունեցել սարսափելի աղետը ՀՀ վարչապետ Կարեն Կարապետյանը, նախարարները, ԱԺ պատգամավորները, մարզային և քաղաքային իշխանությունների ներկայացուցիչները, քաղաք այցելած հյուրերը ծաղիկներ դրեցին երկրաշարժի զոհերի հիշատակը հավերժացնող հուշակոթողին, 1 րոպե լռությամբ հարգեցին նրանց հիշատակը:
