ԵՐԵՎԱՆ, 14 դեկտեմբերի — Sputnik. ՀՀ վարչապետ Կարեն Կարապետյանը արտակարգ իրավիճակների նախարարի ժամանակավոր պաշտոնակատար է նշանակել Հայկարամ Մխիթարյանին։
«Ղեկավարվելով 2005 թվականի փոփոխություններով Հայաստանի Հանրապետության Սահմանադրության 87-րդ հոդվածով՝ Հայաստանի Հանրապետության արտակարգ իրավիճակների նախարարի պարտականությունները ժամանակավորապես դնել Հայաստանի Հանրապետության արտակարգ իրավիճակների նախարարի տեղակալ Հայկարամ Մխիթարյանի վրա»,- նշված է ՀՀ վարչապետ Կարեն Կարապետյանի որոշման մեջ։
Նշենք, որ Արմեն Երիցյանը մահացել է նախօրեին, հրաժեշտի արարողությունը տեղի կունենա դեկտեմբերի 16-ին, կհուղարկավորեն Երևանի քաղաքային պանթեոնում։
Հայկարամ Մխիթարյանը ծնվել է 1954թ-ի մայիսի 3-ին Սառնաղբյուր գյուղում։ 1970-1975 թթ-ին սովորել և ավարտել է Դոնի Ռոստովի ժողովրդական տնտեսության ինստիտուտը՝ տնտեսագետի որակավորմամբ։ 1998թ-ին ավարտել է Երևանի «Վարդանանց» համալսարանի իրավաբանական ֆակուլտետը։ 2008թ-ին ավարտել է Մեսրոպ Մաշտոցի անվան համալսարանի իրավաբանական ֆակուլտետը։ Տնտեսագիտության թեկնածու է, 10 հրապարակված աշխատության հեղինակ։
1995 թ. հուլիսի 5-ին ընտրվել է ՀՀ Ազգային ժողովի 1-ին գումարման պատգամավոր թիվ 51 ընտրատարածքից։ ԱԺ պետական-իրավական հարցերի մշտական հանձնաժողովի անդամ։ ԱԺ «Բարեփոխումներ» պատգամավորական խմբի անդամ։
2002 թ. ՀՀ վարչապետի որոշմամբ նշանակվել է ՀՀ կառավարության աշխատակազմի գործերի կառավարիչ։
2008 թ. մայիսի 27-ին ՀՀ վարչապետի որոշմամբ 2008 թ. հունիսի 30-ից ազատվել է Հայաստանի Հանրապետության կառավարության աշխատակազմի գործերի կառավարչի պաշտոնից՝ իր դիմումի համաձայն։
2008-2010 թթ. —ին` ՀՀ նախագահի աշխատակազմի գործերի կառավարիչ։
2010 թ. ՀՀ վարչապետի որոշմամբ նշանակվել է ՀՀ արտակարգ իրավիճակների նախարարի տեղակալ։
2015 թ. հունվարի 13-ին ՀՀ վարչապետի որոշմամբ ազատվել է Հայաստանի Հանրապետության արտակարգ իրավիճակների նախարարի տեղակալի պաշտոնից։
2015 թ. հունվարի 13-ին ՀՀ վարչապետի որոշմամբ նշանակվել է Հայաստանի Հանրապետության տարածքային կառավարման և արտակարգ իրավիճակների նախարարի տեղակալ։
