ԵՐԵՎԱՆ, 16 դեկտեմբերի — Sputnik. Բելառուսի ամենահայտնի մոդելներից մեկին՝ Նատալյա Մաքեյին մահացած են գտել իր բնակարանում: Այս մասին հայտնում է Sputnik Բելառուսը:
Որոշ տեղեկություններով՝ նա թունավորվել է ածխագազից: Ինչպես գրում է belaruspartisan-ը, կինը դեկտեմբերի 15-ին վերադարձել է Լեհաստանից, սկայպով գրել մորը, որ արդեն Մինսկում է:
«Ես նրան զանգեցի մոտավորապես 11-ին, ասաց, որ արդեն քնում է: Իսկ ցերեկվա երեքին սկսեցին զանգել ընկերները, թե Նատաշան չի պատասխանում: Ես էլ սկսեցի զանգել: Նա գալուց հետո չէր կարողանում միացնել գազի կաթսան: Հավանաբար հետո միացրել է ու քնել: Եվ վերջ…»,- պատմել է Նատաշայի մայրը:
Դեպքի վայր ժամանած փրկարարներն ասել են, որ «գազի մակարդակը բարձր է եղել»:
«Այնքան բարի էր, նուրբ, գեղեցիկ… Շատ եմ ցավում… Ամեն անգամ նրա հետ հանդիպելիս ու շփվելիս այնքան ջերմություն էի ստանում: Բարեհամբույր, հաճելի, երբեք որևէ մեկի հասցեին վատ խոսք չէր ասի: Միշտ շքեղ տեսք ուներ: Շատ ափսոս… Աստված քեզ հետ, Նատալյա Մաքեյ: Հանգչիր խաղաղությամբ… Ցավակցում եմ հարազատներին ու բարեկամներին»,- Ֆեյսբուք սոցիալական ցանցում գրել է Իրինա Կաբասակալը:
Մաքեյը ցուցադրությունների ու գովազդային նկարահանումների է մասնակցել դեռ ուսանողական տարիներին:
Մինսկի քննչական կոմիտեի շրջանային բաժինը նրա մահվան փաստի առնչությամբ ստուգում է անցկացնում:
