Լիբանյան օրենքների համաձայն՝ նախագահն ընտրվելուց հետո պետք է 48 ժամում ձևավորի նոր կառավարությունը, այնինչ նորընտիր նախագահ Միշել Աունին դա հաջողվել է անել 48 օրում:
Նոր ձևավորված կառավարության կազմում ընդգրկված հայ նախարարներից Ժան Օղասաբյանը Հնչակյան կուսակցությունից է, իսկ Ավետիս Կիտանյանը՝ Դաշնակցությունից։ Միսակ Նաջարյանի խոսքով՝ Լիբանանի կառավարության կազմում հայերը միշտ էլ պորտֆել են ունենում: Դա ամրագրված չէ օրենքով, բայց ըստ ավանդույթի՝ յուրաքանչյուր կառավարության կազմում գոնե 1 հայ է լինում:
Լիբանանում նախագահի պաշտոնը թափուր էր 2014թ․ մայիսի 25-ից, երբ Միշել Սուլեյմանը լքեց Բաաբդայի պալատը։ Ավելի քան երկու տարի լիբանանցի օրենսդիրները չէին կարողանում պայմանավորվածության գալ և ընտրել քաղաքական այնպիսի գործչի, որը հավանության կարժանանար և՛ քրիստոնեական, և՛ մուսուլմանական կուսակցությունների կողմից: Ի վերջո, հոկտեմբերի 31-ին նախագահ ընտրվեց քրիստոնյա քաղաքական գործիչ, գեներալ Միշել Աունը:
