ԵՐԵՎԱՆ, 20 դեկտեմբերի-Sputnik, Արմենուհի Մխոյան. Այս անգամ ևս Գյումրու քաղաքապետը՝ գյումրեցի մանուկների հետ միասին, վառեց հայրաքաղաքի գլխավոր տոնածառի լույսերը, որին հետևեց հրավառությունն ու ուրախ երաժշտությունը՝ Գյումրու փողային նվագախմբի կատարմամբ:
Ճիշտ է՝ ցուրտը հաշվի առնելով, անցած տարիների նման երգ ու պար չկար, սակայն Ձմեռ պապի ու Ձյունանուշի պակաս էլ չկար, ինչպես ասում են գյումրեցիները՝ բոլորի ճաշակին ու գրպանին հարմար: Հավանաբար, եղանակի պատճառով Ձմեռ պապերը ճանապարհը շփոթել ու բոլորը Գյումրի էին եկել. եղանակը ճիշտ ու ճիշտ հայրենի Լապլանդիայի եղանակի նման է:
Հիշելով Հռոմի պապի այցը Գյումրի, գյումրեցին ավելացնում է՝ գյումրեցիների կյանքն ըսպես է. Ձմեռը ձմեռ պապ գուկա, ամառը՝ Հռոմի պապ:
Ուրախ տրամադրություն ու հաջորդ տարվա համար հույս ու հավատ ունի նաև Գյումրու քաղաքապետ Սամվել Բալասանյանը, որը Sputnik Արմենիային հավատացրեց՝ գալիք աքաղաղի տարում ամենալավ բաներն է սպասում:
«Վառ գույներ, ուրախություն, ժպիտ, վստահություն, որ մեր քաղաքը կառուցենք, լինի տուրիստական քաղաք, իսկ ամենակարևորը՝ նոր աշխատատեղեր ստեղծվեն»,-նշեց քաղաքապետը:
Հայրաքաղաքի ղեկավարի համար Ամանորն ամենասպասված տոներից մեկն է. «Ինձ համար ամանորը բերք ու բարիք է, լիություն ու ամենամեծ երջանկությունն է»:
Քաղաքապետի համար Գյումրին ամենասիրուն քաղաքն է՝ իր գեղեցիկ տոնածառով, թեև քաղաքապետը դեմ չէ, որ մայրաքաղաքի տոնածառը մի փոքր ավելի ճոխ լինի՝ ավելի շատ զարդարված:
«Բայց մենք էլ հետ չենք մնում»,-ավելացրեց քաղաքապետը՝ փաստելով, որ գյումրեցու վրա ոչ մի բան չի ազդում՝ ո՛չ ցուրտը, ո՛չ երկրաշարժը. գյումրեցին կա ու կլինի:
Սամվել Բալասանյանը նաև տեղեկացրեց, որ տոնական օրերն անցկացնելու է հայրաքաղաքում:
