ԵՐԵՎԱՆ, 21 դեկտեմբերի — Sputnik. Կիևի քաղաքային խորհրդի նիստում որոշվել է մի շարք փողոցներ վերանվանել: Այդ մասին նշված է քաղխորհրդի կայքէջում:
Այսպես, Շևչենկոյի շրջանի Շահումյանի անվան նրբանցքը վերանվանվել է նշանավոր կինոռեժիսոր Սերգեյ Փարաջանովի անունով:
Ավելի վաղ` 2016-ի փետրվարին, Շահումյանի փողոցը Կիևում վերանվանվել էր Փարաջանովի փողոց: Տարեսկզբին մեծանուն հայ ռեժիսորի անունով է կոչվել Ուկրաինայի Ժիտոմիր քաղաքի փողոցներից մեկը։
Հայ մեծանուն կինոռեժիսոր Սերգեյ Փարաջանովը ծնվել է 1924թ.-ի հունվարի 9-ին Թբիլիսիում։
1964 թվականին Փարաջանովը նկարահանել է «Մոռացված նախնիների ստվերները» ֆիլմը, որը դարձել է 1960-ական թվականների խորհրդային կինոյի ամենավառ իրադարձություններից մեկը և իր տեղը զբաղեցրել այնպիսի հայտնի ֆիլմերի կողքին, ինչպիսիք են Միխայիլ Կալատոզովի «Թռչում են կռունկները», Գրիգորի Չուխրայի «Բալլադ զինվորի մասին» և Անդրեյ Տարկովսկու «Իվանի մանկությունը»։
Փարաջանովի գլուխգործոցը կարելի է համարել «Նռան գույնը» (1968թ.), որը պատմում է թբիլիսահայ աշուղ Սայաթ-Նովայի կյանքի մասին։ Երկու լիամետրաժ ֆիլմերն էլ ենթարկվել են խորհրդային գրաքննությանը։
