ԵՐԵՎԱՆ, 22 դեկտեմբերի — Sputnik. Պրոբացիայի ծառայության, քաղաքացիներին սպասարկող միասնական գրասենյակների ստեղծում, ՄԻՊ-ի նոր օրենքի ընդունում, կոռուպցիայի դեմ պայքարի շրջանակներում էլ՝ ապօրինի հարստացումը կանխող օրենսդրական փաթեթի ընդունում:
Սրանք անցնող տարվա այն հիմնական ձեռքբերումներն են, որոնք լրագրողների հետ հանդիպմանը նշեց Արդարադատության նախարար Արփինե Հովհաննիսյանը:
«Բոլոր խնդիրները 100 տոկոսով չենք լուծել, բայց գերակշիռ մասը լուծել ենք»,- ասաց նա:
Իսկ լրագրողների ու հանրության ուշադրության կենտրոնում հատկապես ապօրինի հարստացած պաշտոնյաներին պատժելու հարցն է: ԱԺ-ի ընդունած օրենքն ուժ-ի մեջ կմտնի միայն հաջորդ տարվա հուլիսի 1-ին: Դրանից հետո ապօրինի հարստացած պաշտոնյաները բացահայտվելու դեպքում կպատժվեն, իսկ մինչ այդ հարստացածների վրա օրենքը չի տարածվի: Հենց սա էլ հասարակության շրջանում դժգոհության պատճառ է դարձել:
«Կեղծ դիվիդենտներ շահելու համար անմիջապես չասացինք, որ վաղվանից այդ օրենքն ուժի մեջ է մտնում: Հենց նրա համար, որպեսզի հենց հաջորդ օրը քննադատություն չլինի, թե՝ գիտեք, ապօրինի հարստացումն ուժի մեջ է, բայց չի գործում»,- ասաց նախարարը՝ հավելելով, որ դրա համար անհրաժեշտ են մի քանի օղակներ, որոնցից այսօր ապահովված է միայն երկուսը:
Երկրորդ հարցն այն է, թե որն է փոխկապակցված անձանց այն շրջանակը, ում անունով պաշտոնյան կարող է գրանցել իր ապօրինի ձեռք բերված ունեցվածքն ու մնալ անպատիժ:
«Օրինակ՝ պաշտոնատար անձը որևէ մեքենա է վարում, բայց այն իր անունով չէ: Արդյո՞ք այն անձը, որի անունով սեփականությունը գրանցված է դրածո է, թե ոչ կամ ի՞նչ առնչություն ունի պաշտոնատար անձի հետ: Այդ մեխանիզմները զարգանում են պրակտիկայի ընթացքում և հետո դառնում օրենսդրության մաս: Այդ պրակտիկան այս ձևով է իրականացվում, քանի դեռ Հայաստանի բոլոր քաղաքացիները չեն դարձել հայտարարագիր ներկայացնողներ»,- ասաց Արփինե Հովհաննիսյանը:
Երբ ՀՀ բոլոր քաղաքացիները կսկսեն հայտարարագրել իրենց եկամուտները, դրածոների հարցն, ըստ նախարարի, ինքն իրեն կլուծվի: Իսկ մինչ այդ նոր օրենքով ընդլայնվել է հայտարարագիր ներկայացնող անձանց ցանկը:
Ներկայում հայտարարագիր է ներկայացնում շուրջ 500 պաշտոնյա և նրանց հետ փոխկապակցված անձ: Հաջորդ տարվա հուլիսի մեկից նրանց ցանկը գրեթե կրկնակի կլինի:
