ԵՐԵՎԱՆ, 25 դեկտեմբերի — Sputnik, Արմենուհի Մխոյան. Պատարագի ժամանակ հոգևորականը տալիս է ծննդյան ավետիսը. «Քրիստոս ծնավ եւ հայտնեցավ», իսկ ժողովուրդը պատասխանում է. «Մեզ և ձեզ մեծ ավետիս»:
Մինչ դեկտեմբերի 25-ին մատուցվող ծննդյան ավետիսի պատարագը, կաթողիկե բոլոր համայնքներում դեկտեմբերի 24-ի երեկոյան մատուցվում է Ճրագալույցի Սուրբ պատարագ, որին մասնակցում են ընտանիքներով: Դեկտեմբերի 24-ին երեկոյան պատարագ մատուցվեց նաև Հայաստանի, Վրաստանի, Ռուսաստանի և Արևելյան Եվրոպայի հայ կաթողիկեների առաջնորդանիստ Գյումրու «Սրբոց նահատակաց» եկեղեցում:
Տարիներ շարունակ կաթողիկե համայնքների բնակիչները, հետևելով իրենց եկեղեցու ծեսերին ու օրենքներին, հաճախել ու հաճախում են իրենց համայնքներում գործող կաթողիկե եկեղեցիներ՝ հավատարիմ իրենց եկեղեցուն:
Շիրակի մարզում կա գործող 9 կաթողիկե եկեղեցի: Մարզում կաթողիկե բնակչություն ունեցող համայքներ են Մեծ Սեպասարը, Ղազանչին, Բավրան, Արևիկը, Փանիկը, Ձիթհանքովը, Ազատանը, Լանջիկը և այլն: Կաթողիկե հետևորդներ ունի նաև Գյումրին:
Ինչպես տեղեկացնում են Կաթողիկե առաջնորդարանի մամուլի գրասենյակից, թեև Գյումրիի կաթողիկե բնակչության թիվը հաշվելը բավական դժվար է, բայց այս պահին ակտիվ կաթողիկեները Գյումրիում, ովքեր ամեն կիրակի կանոնավոր ներկա են Սբ. Պատարագին մոտ 200 է: Ի դեպ, Գյումրիում կան նաև մարդիկ, որոնք հաճախում են թե՛ կաթողիկե, և թե՛ առաքելական եկեղեցի:
«Մեզ համար միևնույն է՝ լինի առաքելական թե կաթոլիկ: Երկու եկեղեցին էլ մեզ համար շատ թանկ են ու կարևոր: Եթե ժամանակը ներում է՝ երկու եկեղեցում էլ պատարագներին ու ժամերգություններին մասնակցում ենք»,-նշում են հավատացյալները:
Շատերի համար դա այսօր այդպես է ու տարբերություն չկա իրենց աղոթքն առ Աստված բարձրացնում են թե՛ հայ կաթողիկեների առաջնորդանիստ Գյումրու «Սրբոց նահատակաց» եկեղեցում, թե՛ Հայ Առաքելական եկեղեցու Շիրակի թեմի առաջնորդանիստ «Սուրբ Յոթվերք» եկեղեցում:
Բայց շատ տարիներ առաջ բոլորովին այլ էր՝ ժողովուրդը նույնիսկ այնքան սուր էր այդ տարբերությունը տեսնում, որ հարս չէին բերում, կամ աղջիկ չէին տալիս:
«Շատ տարիներ առաջ այդպես էր, նույնիսկ երեխաներին չէին ամուսնացնում, եթե նույն եկեղեցու հետևորդներ չէին՝ հարս չէին բերում, աղջիկ չէին տալիս, իսկ հիմա լրիվ այլ է՝ տարբերություն չկա: Հռոմի Ֆրանցիսկոս Պապն էլ որ եկավ բոլորին ցույց տվեց որ մեր մեջ՝ կաթոլիկների ու առաքելականների, տարբերություն չկա»,-Sputnik Armenia-յի հետ ունեցած զրույցի ժամանակ նշեց տիկին Անահիտը, հավաստիացնելով, որ «Սրբոց նահատակաց» եկեղեցում պատարագին մասնակցելուց հետո շտապում է նաև «Յոթ Վերք» եկեղեցի:
