ԵՐԵՎԱՆ, 4 հունվարի — Sputnik. Տոնական օրերին Առողջապահության նախարարության «Թեժ գիծ» ծառայության հեռախոսահամարին ստացվել է 78 զանգ: Այս մասին Sputnik Արմենիային հայտնեց ծառայության պատասխանատու Հասմիկ Հարությունյանը:
Ահազանգերը, նրա խոսքով, հիմնականում տեղեկատվական բնույթի են եղել: Զանգահարողները հետաքրքրվել են՝ աշխատու՞մ են արդյոք տոն օրերին պոլիկլինիկաները, այս կամ այն հիվանդանոցը: Երկու հեռախոսազանգ կազմակերպչական բնույթի է եղել. կարիք է զգացվել հիվանդներին մարզից մայրաքաղաք տեղափոխել շտապօգնության ավտոմեքենայով, ինչը, մեր զրուցակցի հավաստմամբ, նախարարության միջամտությամբ կազմակերպվել է:
Իսկ մեկ ահազանգ էլ վերաբերել է անվճար բուժօգնության հավաստագիրը կորցնելուն: Այս դեպքում ևս հիվանդը նախարարության միջամտությամբ ընդունվել է հիվանդանոց` աշխատանքային օրերին դիմում գրելու և նոր հավաստագիր ստանալու պայմանով:
Եվս երկու ահազանգ կոնկրետ բուժհիմնարկներից ունեցած դժգոհությունների մասին նախարարությունում գրանցվել է առավել մանրամասն ուսումնասիրության համար:
Մինչև հունվարի 9-ը ևս «Թեժ գիծ» ծառայությունը շուրջօրյա հերթապահություն է իրականացնելու: Առողջապահական համակարգի հետ կապված խնդիրների դեպքում կարող եք զանգահարել 010 52-88-72 հեռախոսահամարով:
