Արմենուհի Մխոյան, Sputnik.
3 տարեկան Ռոկկին, «մամա» ասելուց բացի, կարող է նաև երգել, ինչպես Կարենն է ասում՝ ճաշակով երաժշտության տակ, բայց դրա համար այս դեպքում տիրոջ հրահանգը բավարար չէ. Ռոկկին ինքը պետք է «մուսա» ունենա:
Ռոկկին 3 անգամ եղել է Հայաստանի և 1 անգամ միջազգային մրցաշարի չեմպիոնի թեկնածու: 3 անգամ թեկնածու լինելն արդեն վկայում է, որ Ռոկկին իր ցեղատեսակի մեջ Հայաստանում առաջին է, մնում է միայն՝ վկայագիրը ստանա:
«Շանս որակը հաստատվել է միջազգային ցուցահանդես մրցումների ժամանակ. այնպես չէ, որ գլուխ ենք գովում: Երեք անգամ մասնակցել է մրցումների ու հաղթող է ճանաչվել»,-գյումրեցու հումորով նշում է Կարենը՝ անկեղծանալով, որ բնակարանում նման շուն պահելը շատ դժվար է, իսկ ամենադժվարը հարևաների հետ լեզու գտնելն է:
«Դժվար է բակ հանել օրական 3 անգամ, պարտադիր երկար ժամանակով քայլեցնելը. հոգս ու խնամք է պահանջում, իսկ ամենադժվարը հարևանների մասով է՝ սկզբում զզվում էին, շունս էլ նրանցից, բայց երբ արդեն մրցումներից հետո Գյումրի էինք վերադառնում մեդալներով, սկսեցին սիրել, պարծենալ ու հետը սելֆի անել, նույնիսկ ոստիկանները, եթե առաջ զգուշացնում էին, թե առանց դնչկալի դուրս չբերեմ շանս, հիմա իրենք կանգնում ու նկարվում են շանս հետ: Ճանաչված շուն է»,- նշում է Կարենը:
Բոքսյոր ցեղատեսակի շներն իրենց տեսակով պահապաններ են. եթե նրանց չվնասես,նրանք երբեք չեն վնասի, մարդամոտ են ու հավատարիմ, ագրեսիվ չեն, հատկապես շատ են սիրում երեխաներին՝ երբեք վնաս չեն պատճառի նրանց:
Կարենը հավատացնում է՝ Ռոկկին էլ հենց այդպիսին է և հոգատար ու ջերմ վերաբերմունքը սիրով վերադարձնում է մարդկանց:
