ԵՐԵՎԱՆ, 15 հունվարի — Sputnik, Խաչիկ Չախոյան. Անգլիայի Պրեմիեր լիգայի 21-րդ տուրում «Մանչեսթեր Յունայթեդը» սեփական հարկի տակ 1:1 հաշվով ավարտեց հանդիպումը «Լիվերպուլի» հետ: Մանկունյանցիների մեկնարկային կազմում խաղադաշտ դուրս եկավ նաև Հենրիխ Մխիթարյանը: Սկզբունքային այս մրցավեճում վիճարկվում էր ոչ թե երեք, այլ վեց միավոր. հաղթողը երեք միավոր է վաստակում իսկ մրցակցին երեք միավորով հետ գցում պայքարից:
Ժոզե Մոուրինյոն խաղից առաջ շատ կարևոր տեղեկություն հաղորդեց, ըստ որի՝ խաղադաշտ էր դուրս գալու Զլատան Իբրահիմովիչը: Իհարկե Զլատանի կարիքը, այն էլ նման դիմակայություններում, «Յունայթեդը» ուներ: Հանդիպման մեկնարկը կարելի է ասել՝ սպասելի էր. դաշտի տերերն ակտիվ էին ու ունեին դարպասը գրավելու պահեր, բայց հաշիվը բացեց «Լիվերպուլը»:
Թիմերն ընդհանուր առմամբ իրար դեմ մրցել են 197 անգամ: Մանկունյանցինեևը հաղթել են 79 խաղում, մերսիսայդցիները հաջողության են հասել 65 անգամ: Բացի այս տվյալներից, մրցաշարային ներկայիս աղյուսակը երկու թիմերին էլ պարտադրում էր խաղալ միայն և միայն հաղթանակի համար: Հակառակ դեպքում մրցակիցները կօգտվեին ոչ-ոքիի իրավունքից: Իսկ «Լիվերպուլի» հաղթանակը Յուրգեն Կլոպի թիմին ապահովում էր երկրորդ տեղը:
Հետաքրքիր է, որ այս խաղին կողմերը մոտեցել էին հիանալի ցուցանիշներով: «Յունայթեդը» հաղթել էր բոլոր մրցաշարերում անցկացված վերջին 9 հանդիպումներում: «Լիվերպուլը» հաղթանակի դեպքում վաստակելով 47 միավոր՝ ակումբային նոր ռեկորդ էր սահմանում Պրեմիեր լիգայում 21 խաղերից հետո (2008-2009 մրցաշրջանում թիմը 21 խաղերից հետո վաստակել էր 46 միավոր):
Հայտնվելով հետապնդողի դերում «Յունայթեդը» շարունակ ուղիներ էր փնտրում դեպի Սիմոն Մինյոլեյի պաշտպանած դարպասը, և առաջին կեսի ավարտից հինգ րոպե առաջ Հենրիխ Մխիթարյանը կարող էր խփել պատասխան գնդակը, բայց հիանալի խաղաց «Լիվերպուլի» դարպասապահը: Հենրիխը երկրորդ խաղակեսում էլ շատ լավ պահ ուներ դարպասը գրավելու համար, բայց ընդհուպ մոտենալով դարպասապահին՝ փոխանցում կատարեց, իսկ Մարսիալը չկարողացավ գրավել հյուրերի դարպասը:
Խաղի երկրորդ կեսում «Մանչեսթեր Յունայթեդն» անընդհատ գրոհում էր՝ ստիպելով մրցակցին ավելի հաճախ մտածել պաշտպանության մասին: Ու դաշտի տերերին հաջողվեց վերջապես խփել պատասխան գնդակը: Հանդիպման հիմնական ժամանակի ավարտից վեց րոպե առաջ Զլատան Իբրահիմովիչը վերականգնեց ստաուս քվոն: Հենրիխ Մխիթարյանը հերթական լավ հանդիպումն անցկացրեց իր թիմի կազմում: Հայ ֆուտբոլիստը իր բարձր օգտակար գործողության գործակցով նպաստեց թիմի խաղին:
Դարավոր այս հակամարտությունում հաղթող չորոշվեց: Թիմերի առաջին շրջանի խաղում էլ կողմերը մեկական միավոր էին վաստակել: Բայց «Էնֆիլդում» գրանցվել էր անարդյունավետ ոչ-ոքի: Արդարության համար նշենք՝ խաղի ընթացքը հուշեց, որ «Յունայթեդը» ավելի շուտ մեկ միավոր վաստակեց, քան թե կորցրեց երկուսը: Այս ոչ- ոքին միանշանակ երկու թիմերին էլ օգտակար չեղավ: Սակայն երկուսն էլ պարտված չթողեցին խաղադաշտը, ինչը նույնպես շատ կարևոր է: Պրեմիեր լիգայի ավարտին դեռ 17 տուր կա: Այսինքն ամեն ինչ առջևում է:
