ԵՐԵՎԱՆ, 16 հունվարի — Sputnik. Բիշքեկի մերձակայքում ինքնաթիռի վթարի հետևանքով մահացածների թիվը հասել է 34-ի, հաղորդում է Sputnik Ղրղըզստանը՝ հղում անելով հանրապետության ԱԻՆ-ին:
Turkish Airlines ավիաընկերության բեռնատար Boeing 747 ինքնաթիռը վթարի է ենթարկվել Բիշկեքի մոտակայքում երկուշաբթի վաղ առավոտյան, ինքնաթիռը կատարում էր Հոնկոնգ-Բիշքեկ չվերթը:
Ղրղըզստանի ԱԻՆ տվյալներով՝ ինքնաթիռը կործանվել է օդանավակայանի մոտակայքում գտնվող գյուղում: Վնասվել է շուրջ 15 տուն: Տեղում կազմակերպվել է փրկարարական աշխատանքների իրականացման շտաբ:
Առողջապահության նախարարության տվյալներով՝ դեպքի վայրից հոսպիտալացվել է 8 մարդ, նրանցից վեցը՝ երեխաներ, բոլորի մոտ ծանր վնասվածքներ և այրվածքներ կան:
Sputnik Ղրղըզստանի տվյալներով՝ «Մանաս» օդանավակայանը փակ է, դեպքի վայր է ժամանել Ղրղըզստանի վարչապետ Սոորոնբայ Ժեենբեկովը, ինչպես նաև առաջին փոխվարչապետ Մուխամետկալի Աբուգլազիևը և արտակարգ իրավիճակների նախարար Կուբատբեկ Բորոնովը: