ԵՐԵՎԱՆ, 18 հունվարի — Sputnik. Արման Թաթոյանը վերհիշեց` ամեն ինչ սկսվեց դիվերսիոն փորձով, երբ կյանքից հեռացան 3 հայ զինծառայողները։ Ու դա տեղի ունեցավ այն պայմաններում, երբ իրենց ծառայությունը մատուցող խաղաղ զինվորներն առանց վտանգի զգացողության զոհվեցին։ Հետագա օրերին ռմբակոծվեցին բնակավայրերը։ Հայաստանի մարդու իրավունքների պաշտպանը պարզել է, որ կանայք ու երեխաները ժամերով մնացել են թաքստոցներում։
«Հունվարի 3-ի գնդակոծությունները ևս վտանգավոր են եղել։ Գյուղի մոտակայքում չկա որևէ զորամաս, ռազմական օբյեկտ, որը կարող էր վկայաբերվել ադրբեջանական զինված ուժերի կողմից։ Այստեղ խաղաղ բնակիչներ են, ինչն ակնհայտ է դարձնում խաղաղ բնակիչների կյանքին և առողջությանը վնաս հասցնելու մտադրությունը»,-ասաց նա։
Թաթոյանը տեղեկացրեց, որ իր նախաձեռնած փաստահավաք աշխատանքների արդյունքները հիմնված են բաց տվյալների վրա, իրականացվել են միջազգայնորեն ընդունված նորմերի հիման վրա։
«Մենք այս հարցերում պետք է լինենք արագ ու օպերատիվ, պրոֆեսիոնալ, որքան հնարավոր է, պետք է լինել դուխով, որովհետև ճիշտը մեր կողմն է»,- ասաց Թաթոյանը։
Նա անդրադարձավ նաև ադրբեջանական գործողություններին Լեռնային Ղարաբաղում, նշեց, որ ԼՂՀ մարդու իրավունքների պաշտպանը մեծ դեր ունի ստեղծված իրավիճակում, պետք է ակտիվորեն ներգրավված լինի գործընթացներին, քանի որ մարդու իրավունքները սահմաններ չպետք է ճանաչեն։
Ըստ նրա` առանձնահատուկ ակտիվություն պետք է դրսևորեն հատկապես կոնֆլիկտային և հետկոնֆլիկտային գոտիների օմբուդսմենները։
Արման Թաթոյանն ավելացրեց` հաջորդ շաբաթ մեկնելու է Ստրասբուրգ` Եվրոպայի խորհրդի բարձրաստիճան պաշտոնյաների հետ հանդիպումների։ Հետո մեկնելու է Բրյուսել։ Իրավիճակն ու փաստահավաք աշխատանքների արդյունքները ներկայացնելու է նրանց։
