«Փաստ». Կարեն Կարապետյանը նախկինում սեփականաշնորհված ու թալանված գործարանները հետ է խլելո՞ւ
ԽՍՀՄ-ի փլուզումից հետո, ինչպես մյուս երկրներում, Հայաստանում նույնպես սեփականաշնորհվեցին արտադրական ձեռնարկությունները:
Սեփականաշնորհվեցին և թալանվեցին: «Փաստի» աղբյուրների պնդմամբ՝ ՀՀ վարչապետ Կարեն Կարապետյանը հրահանգել է ուսումնասիրել բոլոր այն սեփականաշնորհված գործարանների փաստաթղթերը, որոնց տերերը պետության նկատմամբ պայմանագրով նախատեսված պարտավորությունները չեն կատարել (ներդրումներ և այլն): Նա մտադիր է օրենքի շրջանակներում նման սեփականատերերից «խլել» գործարանները, հետագայում ներդրումային փաթեթներ պատրաստել և առաջարկել ներդրողներին:
Եթե հաջողվի, ապա ուղղակի հեղափոխություն կլինի արդյունաբերության ոլորտում:
…Իսկ կոմունիստները կհայտարարեն' «Մենք վաղուց էինք ասում, որ սեփականաշնորհված գործարանները պետք է պետականացնել»: Սա, իհարկե, պետականացնել չէ: Վերավաճառքի պես մի բան է, որը կարող է և՛ բյուջեին օգուտ տալ, և՛ շունչ տալ անշնչացած գործարաններին:
«ՀԺ»․ Վերջին օրերին ռուբլին ամրանում է
Արդեն մի քանի օր է, ինչ արտարժույթի փոխանակման կետերում ռուսական ռուբլու առքի գինը գերազանցում է 8 դրամը: Մասնավորապես, երեկ մեկ ռուսական ռուբլին չենջերում գնվում էր 8 դրամ 5 լումայից մինչեւ 8 դրամ 15 լումա գնով:
Իսկ վաճառքի գինը տատանվում է 8 դրամ 30 լումայից մինչեւ 8 դրամ 40 լումա: Վերջին երկու ամսվա ընթացքում ռուսական ռուբլին, դրամով հաշվարկած, արժեվորվել է 12 տոկոսով: Իսկ անցած ուղիղ մեկ տարվա ընթացքում ռուբլին արժեվորվել է 34 տոկոսով: Նշենք, որ ռուբլու փոխարժեքը ներկայումս ամենաբարձրն է անցած 1,5 տարվա ընթացքում:
«Սա որոշակի դրական ազդեցություն կունենա հայաստանյան այն ընտանիքների գնողունակության վրա, որոնց եկամտի աղբյուրը Ռուսաստանում ապրող հարազատների ուղարկած գումարներն են: Սակայն այդ մասնավոր տրանսֆերտների ծավալը անցած երկու տարիների ընթացքում այնքան է նվազել, որ ռուբլու նույնիսկ այսպիսի արժեվորումը չի փոխհատուցում այդ ծավալը»,-գրում է թերթը:
«Հրապարակ». Ամենազոր Լիսկայի չեզոքացումը շատերի առջեւ է դռներ բացել
Սուրիկ Խաչատրյանի դիրքերի սասանումը ոգեւորություն է առաջացրել մրցակից թիմերի ճամբարներում։ Ամենազոր Լիսկայի չեզոքացումը շատերի առջև է դռներ բացել: Կուսակցություններից ՀՅԴ-ն է Սյունիքում բավականին ակտիվ, ԲՀԿ-ն նույնպես չի զիջում, գրում է «Հրապարակ»-ը:
Ըստ թերթի՝ ՀՅԴ-ի ֆավորիտներից մեկը նախկին պատգամավոր, արցախյան ազատամարտին մասնակցած Գագիկ Գևորգյանն է: Խորհրդարանական վերջին ընտրությանը նա հանգրվանել էր ՀՅԴ համամասնական ցուցակի 12-րդ հորիզոնականում։ Դաշնակցության ռեյտինգային ցուցակում կլինի նաև Արտուր Աթայանը՝ Կապանի նախկին քաղաքապետը:
ԲՀԿ-ական ցուցակում տեղ կգրավեն, բնականաբար, սյունեցի պատգամավոր Մերուժան Սիմոնյանը, ԲՀԿ Կապանի տարածքային խորհրդի նախագահ Արթուր Մարտիրոսյանը։ Խոսակցություններ կան նաև Սիսիանի նախկին քաղաքապետ Աղասի Հակոբջանյանի մասին:
«Փաստ». Միհրան Պողոսյանը ուրիշի «բոստան» է մտել, Տարոնի ձայներն է «փախցնում»
Ավան համայնքում իսկական իրարանցում է: Ինչպես հայտնի է, նոր ԸՕ-ով Ավանը, Քանաքեռ-Զեյթունը և Նոր Նորքը կազմում են մեկ ընտրատարածք: Եվ ռեյտինգային քվեարկությամբ այստեղից պատգամավոր ընտրվելու համար պետք է պայքարեն ավանցի Տարոն Մարգարյանի աներորդին` ներկայում պատգամավոր Ռոբերտ Սարգսյանը և զեյթունցի, ԴԱՀԿ նախկին ղեկավար, գեներալ Միհրան Պողոսյանը:
Քանի որ երկուսն էլ ՀՀԿ-ի կարկառուն դեմքեր են (առաջինի դեպքում, խոսքը, իհարկե, Տարոն Մարգարյանի մասին է) և յուրաքանչյուրն իր համայնքում ունի իր` կարելի է ասել, տարիներով ձեւավորված հստակ ընտրազանգվածը, կողմերն, ըստ «Փաստի» տեղեկությունների՝ նախապես համաձայնության էին եկել առ այն, որ միմյանց չեն խանգարելու:
«Բայց արի ու տես, որ նախընտրական պայքարի մեկնարկը պաշտոնապես դեռ չտրված, Միհրան Պողոսյանը համաձայնությունը խախտում է: Մարդիկ, որոնք նախորդ ընտրությունների ժամանակ աշխատել են Տարոն Մարգարյանի, հընթացս նաև նրա աներորդու համար ապահովել համապատասխան ձայներ, սահուն կերպով անցել են գեներալի ճամբար:
Երկար տարիներ այդ մարդիք աշխատել են ավանցի Տ. Մարգարյանի համար` հույսով, որ մի օր իրենց կատարած ոչ այնքան շնորհակալ գործը կգնահատվի, իրենց վարձահատույց կլինեն: Բայց շատերի ակնկալիքները երեւի չեն արդարացել` ի վերջո, քանի մարդու կարող են աշխատանքի տեղավորել, քանիսին կարող են լավություն անել: Ու շատերը դժգոհ են մնացել:
Հիմա հենց այդ դժգոհների միջոցով էլ Միհրան Պողոսյանը փորձում է իր գործն առաջ տանել: Այս ամենին տարոնականները դեռեւս լուռ, բայց ատամները կրճտացնելով հետեւում են: Թե պատասխան ինչ քայլեր կձեռնարկվեն, դժվար է ասել: Գործը կհարթվի վերեւներո՞ւմ, թե առաջին գիծ դուրս կգան ներքևները՝ ցույց կտա ժամանակը»,- գրում է «Փաստը»:
«Ժողովուրդ». Ծառուկյանի վերադարձը հարված էր հենց ՀՀԿ-ի համար
Երեկ գործարար Գագիկ Ծառուկյանը հայտարարեց իր կողմից փակված քաղաքական էջը բացելու եւ լայն դաշինքով ապրիլի 2-ին կայանալիք ընտրություններին մասնակցելու մասին:
«Ժողովուրդը» գրում է, որ այս հայտարարությունը դեռ շատ կմեկնաբանվի ու կքննադատվի, բայց մի բան ակնհայտ է. նրան «չագուճ ու մեխով» քաղաքականությունից դուրս հրավիրող Հանրապետական կուսակցությունը երեկ ողջ օրը ընդհատակում էր: Նախկինում «բլբուլ կտրած» գործիչները, որոնք Ծառուկյանին քաղաքական չարիք էին համարում, խուսափում էին մեկնաբանել Ծառուկյանի վերադարձը քաղաքականություն: Եվ այս իրավիճակում Ծառուկյանի վերադարձը մեծապես խայտառակություն է հենց ՀՀԿ-ի համար, քանի որ իշխող այդ կուսակցության առաջնորդն էր ամպագոռգոռ հայտարարություններ անում, թե կրկեսի վերածելու հայրենիք չունենք:
Ըստ թերթի՝ հիմա, ստացվում է, որ ապրում ենք կրկեսի վերածված հայրենիքում: Ու որքան էլ իշխանական շրջանակներից լուրեր տարածվեն, թե Սերժ Սարգսյանն է Ծառուկյանին «գործուղել» քաղաքական դաշտ, միևնույն է՝ Ծառուկյանի վերադարձը հարված էր հենց ՀՀԿ-ի համար: Ծառուկյանը նրանցից կտանի և՛ ձայներ, և՛ մարդկային ռեսուրս, որոնք տարիների ընթացքում նեղացել են ՀՀԿ-ից: