ԵՐԵՎԱՆ, 18 հունվարի — Sputnik. Վիկտոր Սողոմոնյանը նշել է, որ մամուլի տարբեր միջոցները ոչ մի կերպ չեն կարողանում պայմանավորվել, թե որտեղ է բնակվում Ռոբերտ Քոչարյանը՝ ԱՄՆ-ում, Մոսկվայում, Փարիզում կամ մեկ այլ տեղ, և թե ում հետ է միաժամանակ հանդիպում տարբեր քաղաքներում: Այս մասին նշված է 2rd.am կայքում։
«Այս խնդիրը հաղթահարելու համար ես մեր գրասենյակում պատրաստ եմ ժամանակավոր տարածք տրամադրել առանձին թերթերի ներկայացուցիչներին՝ ստեղծագործական հանդիպում կազմակերպելու և նոր` իրապես սենսացիոն բնակավայրերի մասին հոդվածներ հորինելու համար: Առկա տարբերակները չափազանց պարզունակ են։ Իսկ եթե լուրջ` ապա Ռոբերտ Քոչարյանը շարունակում է բնակվել Երևանում և բնակավայրը փոխելու որևէ մտադրություն չունի»,- ասել է Սողոմոնյանը:
Ըստ նրա` Քոչարյանը ԱՄՆ վերջին անգամ այցելել է 2014 թվականին, մի քանի օրով:
«Մեկ տողով ասեմ նաև այսպես կոչված «գաղտնի» հանդիպումների մասին, ավելի ճիշտ՝ կրկնեմ. երկրորդ նախագահը ում հետ և երբ ցանկանում է՝ հանդիպում է Հայաստանում, ու գաղտնի ձևաչափերի կարիք չունի»,- ասել է Սողոմոնյանը:
Նա հայտնել է նաև, թե ինչու Ռոբերտ Քոչարյանը հարցազրույց չի տալիս և գնահատականներ չի ներկայացնում առկա իրավիճակի վերաբերյալ։
«Ուշացումը մի քանի պատճառ ունի. քաղաքական գործընթացների տրամաբանությունը որոշակիորեն խաթարված է, դեռևս չի ձևավորվել պայքարի պատրաստվող քաղաքական ուժերի վերջնական դասավորվածությունը, առայժմ անորոշ են մնում ապագա ընտրապայքարի բազմաթիվ կարևոր գործոններ: Այդպիսով, ներքաղաքական իրավիճակը վերլուծելու միակ ձևը բազմակի ենթադրություններ անելն է, ինչը նախագահ Քոչարյանի ոճը չէ»,- ասել է Սողոմոնյանը:
