ԵՐԵՎԱՆ, 18 հունվարի-Sputnik. Մարդու իրավունքների պաշտպան Արման Թաթոյանը պատմեց, որ Չինարի գյուղում անձամբ եղել է այն վայրում, որտեղ գրանցվել է քաղաքացիական բնակչության իրավունքների խախտում։
«Ես անմիջապես խոսել եմ գյուղապետի հետ։ Գյուղի ավագանու անդամի հետ եղել եմ այն վայրում, որտեղ տեղի են ունեցել մարդու իրավունքների խախտումներ։ Տոն օրերին ևս շարունակվել են աշխատանքները»,- պատմեց ՄԻ պաշտպանը։
Թաթոյանը տեղեկացրեց, որ հունվարի 3-ին ադրբեջանական կողմը կրակահերթեր է ուղղել գյուղի մանկապարտեզի ու դպրոցի կողմը։ Կրակահերթը տեղի է ունեցել երեկոյան 18:05-ից մինչև 19։00-ն։ Թաթոյանն էկրանի վրա ցույց տվեց արկի հետքերը մանկապարտեզի վրա, ցույց տվեց այն տները, որոնց վրա ակնհայտ նկատելի են կրակահերթի հետքեր։
«Հունվարի 8-ին գիշերն են գնդակոծել տները։ Այդ ժամը առավել խոցելի է, քանի որ բնակիչները քնած ու պաշտպանվելու քիչ հնարավորութբուն ունեն»- ասաց նա։
Արման Թաթոյանն անդրադարձավ նաև Բաղանիս-Ոսկեպար ճանապարհի ռմբակոծությանը։ Հայտնեց, որ աշխատանքները պատրաստվում է շարունակել նաև այլ վայրերում։
