ԵՐԵՎԱՆ, 18 հունվարի — Sputnik. Հունվարի 18-ին Իտալիայում մեկ ժամվա ընթացքում երեք երկրաշարժ է տեղի ունեցել: Երրորդ ցնցումը՝ 5,6 մագնիտուդ ուժգնությամբ, տեղի է ունեցել Հռոմից 106 կիլոմետր հյուսիս-արևելք: Այդ մասին հայտնել է Եվրոպական միջերկրածովյան սեյսմոլոգիական կենտրոնը:
Իտալիայի կենտրոնական մասում տեղի ունեցած ստորգետնյա երեք ցնցումներից հետո դադարեցվել Է Հռոմի մետրոյի աշխատանքը, տարհանվել են մի շարք դպրոցներ: Այդ մասին հայտնում են իտալական ԶԼՄ-ները:
Երկու նախկին երկրաշարժերը եղել են 5,6 և 5,3 մագնիտուդ ուժգնության:
Զոհերի և վիրավորների մասին տեղեկություններ դեռ չկան։
«Մենք սկսել ենք ստուգել տարածքը, առայժմ մեզ ոչ ոք չի դիմել օգնության համար»,-հայտնել Է Իտալիայի քաղաքացիական պաշտպանության դեպարտամենտի ղեկավար Ֆաբրիցիո Կուրչոն:
ANSA գործակալությունը նշում է, որ վնասվածքներ ու նոր փլուզումներ կան Ամատրիչե քաղաքում, որն ավերվել էր օգոստոսյան հարվածից:
Մասնագետները նշում են, որ այս երկրաշարժերը կրիտիկական չեն Ապենինների համար, բայց տվյալ դեպքում իրադրությունը բարդանում է նրանով, որ տարերքը մոլեգնել է օգոստոսին և հոկտեմբերին երկրաշարժերից տուժած շրջաններում, հաղորդել Է ՌԻԱ Նովոստի գործակալությունը:
