ԵՐԵՎԱՆ, 20 հունվարի-Sputnik. Ռուս-թուրքական մերձեցումը բերեց Հալեպի ազատագրմանը։ Այս համոզմունքը հայտնեց վերլուծաբան Գարիկ Հարությունյանը։ Պատահական չէ, որ հունվարի 12-ին կողմերը համագործակցության փաստաթուղթ ստորագրեցին և սկսվեցին ռազմաօդային ուժերի գործողությունները։
«Երկուսն էլ բավականին լուրջ դիրքեր ունեն Սիրիայում, նրանց համագործակցությունը կարող է երկուսի համար էլ օգտակար լինել։ Երկուսի շահերի համընկնումը բերեց Հալեպի ազատագրման»,-ասաց նա։
Ի դեպ, ալ-Բաբում թուրքական զինուժը գործողություններ էր իրականացնում «Իսլամական պետություն» ահաբեկչական խմբավորման դեմ: Բայց Թուրքիայի զինված ուժերն իրենց նշանառության տակ էին առնում նաև Սիրիայի քրդական ուժերին: Այստեղ նրանք խոչընդոտներ են ունեցել, քանի որ Միացյալ նահանգներն, իր հերթին, ԻՊ-ի դեմ պայքարում քրդերին դիտարկում է որպես դաշնակից։ Հետևաբար, Թուրքիան գտել է, որ իր դաշնակիցը Ռուսաստանն է։
Վերլուծաբան Տարոն Հովհաննիսյանն էլ անդրադարձավ Սիրիայում և Իրաքում «Իսլամական պետություն» խմբավորման մեջ Ադրբեջանի քաղաքացիների ներգրավվածությանը։ Նրա խոսքով` վերջերս ադրբեջանական միգրացիոն ծառայությունը տեղեկություն տարածեց, որ 2016 թվականի ընթացքում Ադրբեջանում 58 մարդու զրկել են քաղաքացիությունից` ահաբեկչական խմբավորումներում մասնակցության համար։ Մինչդեռ վերլուծաբանը համոզմունք հայտնեց, որ այդ թիվը շատ ավելի մեծ է։
«Իրականում, եթե վերլուծում ենք ստացված տվյալները, վերջին` 2013-2014 թվականներին, ադրբեջանական զինյալների թիվը 150 է. սա նշանակում է` տվյալներն ավելի շատ են»,-ասաց Հովհաննիսյանը։
Ինչ վերաբերում է Վրաստանի քաղաքացիներին, ապա նրանք էլ այս գործում պասիվ դիրքերում չեն։ Վրաստանի քաղաքացիների 3 խումբ կա, որ ընդգրկվում է ԻՊ շարքեր։ Դրանք տեղի էթնիկ չեչեններն են, Աջարիայի էթնիկ մուսուլմանները և այնտեղի ադրբեջանցիները։
«Չգիտես ինչու Վրաստանից Թուրքիա մեկնողները հայտնվում են ԻՊ-ի շարքերում։ Սիրիայում Վրաստանի 30 քաղաքացի է զոհվել, իսկ 50-60-ը կռվում են այնտեղ»,-ասաց վերլուծաբան Վլադ Վարդանյանը։
Տեղեկացնենք, որ միջազգային լրատվամիջոցների հաղորդմամբ` «Իսլամական պետություն» ծայրահեղական խմբավորումը 2016 թվականին Սիրիայում և Իրաքում կորցրել է վերահսկողությունը գրաված տարածքների մոտ մեկ քառորդի նկատմամբ:
