ԵՐԵՎԱՆ, 24 հունվարի – Sputnik. ՀՀ արդարադատության նախարար Արփինե Հովհաննիսյանի՝ 2017 թվականի հունվարի 19-ի հրամաններով ԴԱՀԿ ծառայության մի շարք ստորաբաժանումների հարկադիր կատարողների նկատմամբ նշանակվել են ծառայողական քննություններ: Այս մասին հայտնում են ՀՀ արդարադատության նախարարության տեղեկատվության և հասարակայնության հետ կապերի վարչությունից։
Մասնավորապես՝ ծառայողական քննություններ կիրականացվեն Երևան քաղաքի Կենտրոն և Նորք-Մարաշ, Էրեբունի-Նուբարաշեն, Մալաթիա-Սեբաստիա բաժիններում, ինչպես նաև Լոռու, Շիրակի, Կոտայքի մարզային բաժիններում և Գեղարքունիքի մարզի Մարտունի-Վարդենիս բաժանմունքում:
Ծառայողական քննությունների անցկացման հիմքում ընկած են ֆիզիկական և իրավաբանական անձանցից ստացված դիմում-բողոքները:
