ԵՐԵՎԱՆ, 24 հունվարի — Sputnik, Արմենուհի Մխոյան. Հայաստանը շատ մեծ հնարավորություն ունի տեքստիլ արտադրանքով մրցակցելու աշխարհի ցանկացած երկրի հետ, նույնիսկ՝ Չինաստանի, վստահ է SASSTEX ընկերության պատասխանատու Քրիստիան Գելեջին: Հատկապես Շիրակում՝ Վարդան Սրմաքեշի ներդրումային ծրագրի շրջանակներում, SASSTEX-ը փորձ է անում վերականգնել տեքստիլ արդյունաբերական երբեմնի ներուժը: Մինչ Գյումրիում կարի ֆաբրիկայի շահագործման հանձնումը, մարզի երկու համայնքում՝ Արթիկում և Ամասիայում, արդեն բացվել են ուսումնական արտադրամասեր, որտեղ և կպատրաստեն վարպետներ ինչպես Գյումրու, այնպես էլ Արթիկի գործարաններում աշխատելու համար: Հեռանկարն արդեն տեսանելի է:
Միայն Գյումրիում մոտ 500 աշխատատեղ է խոստանում ստեղծել SASSTEX ընկերության տնօրեն Քրիստիան Գելեջին: Կառավարությունն այդ նպատակով ընկերությանը տրամադրել է նախկին մարզային հիվանդանոցի շենքը եւ հարակից տարածքը:
«Մեծ գործարան ենք կառուցելու, շուկան լինելու է Եվրոպայում: Արթիկում նպատակ ունենք երկու գործարան կառուցել, մեկում արտադրելու ենք բանվորական շորեր, երկրորդ գործարանը ուզում ենք սարքել, որպեսզի տրիկոտաժի արտադրությամբ խորանանք ու արտադրենք ZARA-ի համար»,- ասաց Քրիստիան Գերիջին:
Այն հարցին, թե արդյո՞ք կգա ժամանակ, երբ հնարավոր կլինի Հայաստանի շուկայից ընդհանրապես դուրս հանել թուրքական տեքստիլը, Քրիստիան Գելեջին անկեղծացավ՝ ասելով, որ դա կառավարության խնդիրն է, բայց որակական առումով խնդիր չկա:
«Դա պետության գործն է, ոչ թե իմ, ես պետություն չեմ»,-նշեց գործարարը:
Շիրակում արդեն արտադրվում է բանվորական հագուստ հայտնի ավիա ու գերմանական մեքենա արտադրող ընկերությունների համար: Անել այնպես, որ հայկական արտադրանքը մրցակցային լինի ու գրավի ոչ միայն եվրոպական շուկան՝ հնարավոր է, բայց դրա համար պետք է Հայաստանում շատ բան փոխել ու նորից մարդկանց աշխատել սովորեցնել, իսկ Հայաստանի ապագան, ըստ գործարարի, հայ կնոջ ձեռքերում է:
«25 տարվա փլուզումից հետո մեր ժողովուրդն արդեն մոռացել է աշխատելը: Ձեր տղամարդիկ գնում են արտասահմաններում աշխատում են, մի երկու կոպեկ փող են ուղարկում, փորձում են դրանով յոլա գնալ: Սա սխալ է՝ որպես հայ մայրեր, դուք պետք է երկիրը կառուցեք, մայրերը երեխա պետք է ունենան ու տունը պահեն, աշխատեն և ամուսին պահեն»,-նշում է Քրիստիան Գելեջեն՝ անկեղծանալով։- «Իմ մայրիկը Սասունում՝ 5-6 երեխայի հետ էր, մեկն էլ՝ փորի մեջ, երբ հայրս գնաց Հոլանդիայում աշխատելու։ Մայրս ամբողջ ընտանիքը պահեց: Չթողեց, որ որևէ երեխան այլ տեղ գնա, Սասունի հողի վրա պահեց: Ու մեզ սովորեցրեց՝ պիտի պայքարես այդ հողի ու ջրի համար, ապագան մայրերի ձեռքում է, ոչ թե հայրերի: Մայրը պետք է տունը, քաղաքը, երկիրը լցնի երեխաներով»։
Նա խորհուրդ է տալիս կանանց՝ չտրտնջալ, այլ տունը լցնել երեխաներով, դաստիարակել նրանց ու հետն էլ աշխատել: Հետո հպարտությամբ ավելացնում է.
«1993 թվականին եմ եկել, մութ տարիներին այստեղ եմ եղել, պատերազմ, ամեն ինչ տեսել եմ, բայց շարունակել եմ ապրել եմ:Դրա համար եմ ասում՝ եկել եմ ձեզ հետ տանջվելու: 9-րդ տարում 9 երեխա եմ ունեցել»:
Կարծում եմ՝ Հայաստանի բարեբեր հողում 9 տարում 9 երեխա ունեցող Քրիստիանի՝ նոր աշխատատեղեր ստեղծելու, որակյալ արտադրանք թողարկելու ու արտադրանքի 90 տոկոսը արտահանելու նպատակներին հավատալ կարելի է:
