ԵՐԵՎԱՆ, 24 հունվարի — Sputnik. Աստանայում Սիրիայի կառավարական պատվիրակության ղեկավար և ՄԱԿ-ում Սիրիայի մշտական ներկայացուցիչ Բաշար Ջաֆարին Sputnik Arabic-ին հայտնել է, որ բանակցությունները հաջող են ընթացել սիրիական, ռուսական և իրանական կողմերի նախապատրաստական աշխատանքների շնորհիվ։
Աստանայում հունվարի 23-24-ը կայացած բանակցությունների արդյունքում ՌԴ-ն, Իրանը և Թուրքիան համատեղ հայտարարություն են ընդունել, որում կողմերը հայտարարել են Սիրիայում հրադադարի ռեժիմի պահպանման համար եռակողմ մեխանիզմների ստեղծման մասին։
«Բանակցությունները մենք դրական ենք գնահատում։ Ահաբեկչության դեմ պայքարի շրջանակում ձեռնարկված բոլոր միջոցներնարդյունավետ են, և մենք շնորհակալ են դրանց համար», — ասել է Ջաֆարին։
Խոսելով ապագայի մասին՝ նա նշել է, որ պետք է դիտարկել, թե ինչպես կարելի է Աստանայում անցկացրած բանակցությունների արդյունքները կիրառել գործնականում։ Մեկնաբանելով ահաբեկչության դեմ համատեղ պայքարի շրջանակում Սիրիայի կառավարության և ընդդիմության միջև ձեռքբերված պայմանավորվածությունների իրական լինելու հանգամանքը` Ջաֆարին հաստատել է համատեղ համաձայնագիր կնքելու հնարավորությունը։
