ԵՐԵՎԱՆ, 25 հունվարի — Sputnik. Հայաստանի բնակչությունն արդեն այս գիշեր կզգա Միջերկրական ծովի շրջաններից եկող օդային տաք հոսանքների ազդեցությունը։ Սնդիկի սյունը կբարձրանա միանգամից մի քանի աստիճանով, և Երևանում կհասնի մինչև —6 աստիճանի։
«Հունվարի 26-ին գտնվելու ենք Կիպրոսից եկող հզոր ցիկլոնի պասիվ փուլում։ Սակայն ցիկլոնի ազդեցությունը մենք կզգանք արդեն այս գիշեր», — Sputnik Արմենիա մամուլի կենտրոնում ասաց ՀՀ ԱԻՆ Հիդրոմետ ծառայության օդերևութաբանության կենտրոնի պետ Գագիկ Սուրենյանը։
Մոտեցող ցիկլոնը ոչ միայն կտաքացնի Հայաստանը, այլև առատ տեղումներ կբերի։ Հունվարի 27 —ին և 28-ին ՀՀ ողջ տարածքում համատարած ժամանակ առ ժամանակ կտեղա ձյուն, լեռնային շրջաններում ձյունը կուղեկցվի բքով, հունվարի 29-ի գիշերը ձյան տեղումները կպահպանվեն, իսկ առավոտյան ժամերին արդեն տեղումների ինտենսիվությունը կնվազի, իսկ հունվարի 30-ին արդեն տեղումներ չեն լինի:
Բոլոր մարզերում, այդ թվում Արարատյան դաշտում օդի ջերմաստիճանը կբարձրանա 10 աստիճանով։ Եթե այսօր ցերեկը Երևանում գիշերվա ժամերին 6-ից —8 աստիճան է գրանցվելու, ապա արդեն հունվարի 26-ին օդի ջերմաստիճանը կհասնի —3 աստիճանի։
Կանխատեսվել էր, որ հունվարին տեղումները նորմայից առատ են լինելու։ Գագիկ Սուրենյանի խոսքով` այս երեք օրերին հանրապետությունում կգրանցվեն նորմայից կրկնակի շատ տեղումներ։
Կիպրոսից ներթափանցող օդային հոսանքները 99%-ով կցրեն չարաբաստիկ մառախուղը։ Ամբողջ խնդիրը Արարատյան դաշտի գոգավոր ռելիեֆն է։ Հայաստանի տարածքում տարածված տաք օդային հոսանքները չէին կարող դուրս մղել Արարատյան դաշտից եկող սառը օդն ու մառախուղը։
Այս տարի Արարատյան դաշտում մառախուղը 40 օր տևեց։ Նման բան է եղել 1932 թվականին, 1953 թվականին` 90 օր, 1964, 1972 և 2013 թվականներին։
«Տևական մառախուղի և խոնավ օդի պատճառով, օդի ջերմաստիճանը կարող է 5 աստիճան ցուրտ թվալ, քան իրականում։ Նման եղանակը կարող է հանգեցնել նաև վատ ինքնազգացողության և դեպրեսիայի»,- ասաց Սուրենյանը։
Նրա խոսքով` 2016-2017 թվականների ձմեռը չի կարելի «խիստ» անվանել, քանի որ օդի ջերմաստիճանը միայն մեկ անգամ է եղել —18, իսկ մյուս օրերին սնդիկի սյունը չի իջել —12 աստիճանից։
Սյունիքում, Ղափանում, Ագարակում առանձին օրերին օդի ջերմաստիճանը հասել է 17 աստիճան տաքության, Բերդում` 15, Մարտունիում, Գավառում, Ապարանում 4-5 աստիճան տաքություն։
