ԵՐԵՎԱՆ, 26 հունվարի — Sputnik. Էդուարդ Շարմազանովը հայտնեց, որ ՀՀԿ խԽորհրդի նիստի ընթացքում ձևավորվել է կուսակցության նոր խորհուրդ, որին անդամակցել է կուսակցության 35 նոր անդամ:
«Ընտրել ենք կուսակցության նախագահի տեղակալներ: Կուսակցության նախագահի առաջին տեղակալ է ընտրվել վարչապետ Կարեն Կարապետյանը, նախագահի տեղակալներ են ընտրվել Գալուստ Սահակյանը, Մուշեղ Լալայանը և Արմեն Աշոտյանը»,- ասաց Շարմազանովը:
Ինչ վերաբերում է ՀՀԿ նախկին փոխնախագահ Հովիկ Աբրահամյանի՝ կուսակցությունից հեռանալու որոշմանը, ՀՀԿ խոսնակը նշեց, որ դա Հովիկ Աբրահամյանի որոշումն է, որից ՀՀԿ-ն չի թուլացել։
«Իշխանությունը վայելք չէ, այլ՝ պատասխանատվություն»,- ասաց նա։ Արտահոսքի մասին խոսակցություններն էլ անհեթեթություն որակեց։
Շարմազանովի խոսքով՝ կուսակցության վերջին համագումարից հետո որոշվել էր ձևավորել ավագների խորհուրդ: Խորհրդի նիստի ընթացքում ավագների խորհրդի նախագահ է ընտրվել ՀՀ Ազգային ժողովի նախագահ Գալուստ Սահակյանը:
ՀՀԿ երևանյան կառույցի ղեկավար է ընտրվել Տարոն Մարգարյանը, կանանց խորհրդի ղեկավար է վերընտրվել Հերմինե Նաղդալյանը:
