ԵՐԵՎԱՆ, 26 հունվարի — Sputnik. Մոսկվայում բացվել է Հայաստանի նախագահ Սերժ Սարգսյանի անձնական լուսանկարիչ Դավիթ Հակոբյանի աշխատանքների ցուցահանդեսը։
«Ցուցահանդեսում 22 լուսանկար է ներկայացվել, որոնք նվիրված են Հայաստանի անկախության 25-ամյակին, հայկական բանակի կազմավորման 25-ամյակին, ինչպես նաև Հայ առաքելական եկեղեցու Մոսկվայի թեմի հիմնադրման 300-ամյակին», — Sputnik Արմենիայի թղթակցի հետ զրույցում ասաց Հակոբյանը։
Նրա խոսքով` լուսանկարների մեծ մասն արդեն ցուցադրվել է Երևանում, մոսկովյան ցուցահանդեսում որոշակի փոփոխություններ են արվել, և հայ-ռուսական հարաբերությունների վերաբերյալ ավելի շատ լուսանկարներ են ներկայացվել։ Հայ առաքելական եկեղեցու Մոսկվայի վանական համալիրի «Տապան» թանգարանում անցկացվող ցուցահանդեսը կտևի մինչև փետրվարի 23-ը։
Հակոբյանի հաջորդ ցուցահանդեսը կանցկացվի Վարշավայում մեկ ամիս անց։ Ցուցահանդեսը կներկայացվի որոշակի փոփոխություններով և կարտացոլի երկկողմանի կապերը։
