ԵՐԵՎԱՆ, 30 հունվարի — Sputnik. Երգիչ Ֆրիկ Ռոստոմյանը կմասնակցի ռուսական «Ձայնը» («Голос-2017») հեռուստանախագծին։ Այս մասին հայտնում է Պենզայի առաջին պորտալը։
Երգիչը Ջո Կոկերի երկրպագուներից է և նախագծում ելույթ ունենալու համար հենց նրա երգերից է ընտրել։ Ֆրիկը ցանկանում է, որ նախագծում իր մարզիչը լինի Գրիգորի Լեպսը, որին նաև «ռուս Կոկեր» են անվանում։
Ռոստոմյանը համոզված է, որ այս նախագծում հաղթելը պարտադիր չէ, կարևորը` սեփական ուղին հարթելն է։
«Երգչուհի Նարգիզը` վառ օրինակ։ Նա չհաղթեց նախագծում, բայց կարողացավ գրագետ օգտագործել ընձեռված հնարավորությունը։ Նույնը ես եմ ուզում»,- ասել է նա։
Ռոստոմյան նշել է, որ իրեն շատ կօգնի հայկական նախագծի մասնակցությունը, քանի որ ստիպված է եղել մրցել ուժեղ կազմի հետ։
