ԵՐԵՎԱՆ, 31 հունվարի — Sputnik. Միացյալ Նահանգների վարչակազմը մի քանի տարի շարունակ Եվրոպայում հետևողականորեն թշնամու կերպար էր կերտում` ի դեմս Ռուսաստանի, Sputnik Արմենիային ասաց քաղտեխնոլոգ Վիգեն Հակոբյանը` մեկնաբանելով Sputnik-ի կողմից անցկացրած հարցման տվայլները։
Եվրոպայի բոլոր երկրներում հարցվածների ավելի քան կեսն ասել է, որ ԵՄ-ն չի կարող իրեն պաշտպանել, և անհրաժեշտ է ՆԱՏՕ-ի ու ԱՄՆ-ի աջակցությունը։ Իսկ ԱՄՆ-ում նման կարծիք ունի հարցվածների 48%-ը։ Գերմանիայի (63%), Իտալիայի (65%) և Լեհաստանի (65%) բնակիչներն էլ առավել քան համոզված են, որ ԵՄ-ին պետք են ՆԱՏՕ-ն և ԱՄՆ-ն։ Ֆրանսիայում (30%), Իսպանիայում (33%) և ԱՄՆ-ում (31%) ավելի շատ է այն մարդկանց թիվը, որոնք կարծում են, որ ԵՄ-ն կարող է ինքն իրեն պաշտպանել։ Ընդ որում, ԱՄՆ նախագահ Դոնալդ Թրամփը ՆԱՏՕ-ն «հնացած կազմակերպություն» է անվանել։
Հակոբյանի կարծիքով` այն հարցը, թե կարող է Եվրոպան ինքնուրույն պաշտպանել իրեն, արհեստական ծագում ունի։
Նրա խոսքով` սա բավական տարածված հնարք է, որը կիրառում է Միացյալ Նահանգները։
«Տասնամյակներ շարունակ, հատկապես Օբամայի կառավարման տարիներին թշնամու կերպար էր կերտվում։ Ստեղծվում էր հիստերիայի մթնոլորտ, ակտիվորեն առաջ էր տարվում այն գաղափարը, թե եվրոպացիները չեն կարող ինքնուրույն պաշտպանվել ուժեղ թշնամուց, և ասվածի տակ ենթադրվում էր Ռուսաստանը։ ԱՄՆ-ն հանդես էր գալիս պաշտպանի դերում, որը պետք է արտոնություններ ունենար այլ ոլորտներում` տնտեսական, հումանիտար, աշխարհաքաղաքական», — ասաց Հակոբյանը։
Քաղտեխնոլոգի կարծիքով` սա ավելի շուտ ոչ թե օբյեկտիվ գործոնների ազդեցության հետևանք է, այլ` հետևողական աշխատանքի, այդ թվում` քարոզչության։
Հակոբյանի խոսքով` Լեհաստանում, օրինակ, թերարժեքության բարդույթ կա, այդ պատճառով Լեհաստանն ամեն կերպ ջանում է ապացուցել, որ իր համար կարևոր են արևմտյան արժեքները և որ երկիրը «արևմտյան ընտանիքի» անդամ է։
«Հենց Լեհաստանում և Մերձբալթյան երկրներում հակառուսական տրամադրություններն առավել ծայրահեղականորեն են արտահայտվում», — ասում է Հակոբյանը։
Ինչ վերաբերում է Գերմանիային, ապա այս երկրի քաղաքացիների բարդույթներն ի հայտ են եկել Երկրորդ համաշխարհային պատերազմից հետո։ Մասնավորապես, ներկա պահին գերմանացիները վախենում են որևէ կողմի հարձակումից։
«Սա մեծ խնդիր է մի ժողովրդի համար, որն առանցքային դեր է ունեցել աշխարհում և պետք է պահպանի իր դերը։ Երկիրը բացարձակապես այլ առաջնահերթություններ պետք է ունենա և՛ աշխարհաքաղաքականության մեջ, և՛ սեփական զարգացման հարցում։ Գերմանիան կարող է գերիշխող գերտերություն դառնալ։ Ինքնուրույն պաշտպանվելու հարց այնտեղ չպետք է դրվի», — ասաց Հակոբյանը։
