ԵՐԵՎԱՆ, 31 հունվարի — Sputnik. Ամերիկայի Հայ դատի հանձնախումբը հայտարարություն է տարածել Սպիտակ տան հրամանագրի առնչությամբ, որով արգելվում է մի շարք երկրների քաղաքացիների մուտքը ԱՄՆ։
Հայ դատի հանձնախումբը մտահոգիչ է համարում հրամանագրի շուրջ զարգացող իրավիճակը` ինչպես ԱՄՆ-ի քաղաքականության, այնպես էլ հայ անհատների ու ընտանիքների վրա այդ հրամանի թողած հետևանքների առումով։
Հրամանագիրն 90-օրյա ժամկետով ԱՄՆ մուտքի սահմանափակումներ է սահմանում Սիրիայի, Իրաքի, Իրանի, Լիբիայի, Եմենի, Սոմալիի և Սուդանի քաղաքացիների համար՝ անկախ նրանց կարգավիճակից։
Ինչպես նշում է Հայ դատի հանձնախումբը, առայժմ պարզ չէ, թե այդ իրավական գործողությունն ինչ ազդեցություն կունենա ԱՄՆ քաղաքացի չհանդիսացող անձանց վրա։ Հանձնախումբը նշել է, որ շարունակում է աշխատանքը համապատասխան կողմերի հետ՝ այդ թվում Կոնգրեսի և Սպիտակ տան։
Հանձնախումբը խորհուրդ է տվել այն հայերին, որոնց բարեկամները կամ ընկերները ձերբակալվել են ԱՄՆ մուտք գործելիս կամ որոնց թույլ չեն տվել վերադառնալ ԱՄՆ, կապ հաստատել հանձնաժողովի հետ և պատրաստ լինել, որ որոշակի տեղեկություն հայտնելու անհրաժեշտություն կլինի։
Ամերիկայի Հայ դատի հանձնախումբը խորհուրդ է տալիս Իրանից, Իրաքից, Լիբիայից, Սոմալիից, Սուդանից, Սիրիայից և Եմենից ԱՄՆ եկած հայերին, որոնք ԱՄՆ քաղաքացիներ չեն, խուսափել ԱՄՆ-ից դուրս գալուց, քանի որ նրանց կարող են թույլ չտալ վերադառնալ երկիր՝ անկախ իմիգրացիոն կարգավիճակից։
