«Ֆենոմենալ հիշողություն ունեցող աղջիկ», ՆՏՎ հեռուստաընկերության և Sputnik լրատվական գործակալության ու ռադիոյի համատեղ նախագծի մասնակից Սաբինայի մասին խոսելիս այսպես է բնութագրում Վանաձորի գիշերօթիկ դպրոցի երգի ուսուցչուհին։
Սաբինան կարողանում է երգը սովորել ընդամենը երեք անգամ լսելուց հետո, ու նա շատ դժվարությամբ է դադարեցնում երգի դասը։
«Ты супер!» նախագծին պատրաստվող հայուհին 15 տարեկան է, որոշ ժամանակ ապրել է իրեն որդեգրած ընտանիքում, սակայն շուրջ մեկ տարի առաջ աղջիկը կրկին հայտնվել է մանկատանը։
Վաղ տարիքից Սաբինային գրավել է երգն ու ռուսաց լեզուն։ Վերջին տարիներին նա որոշել է, որ իր համար երգն ավելի կարևոր է, թեև ռուսաց լեզվի մասնագետ (որպես երկրորդ մասնագիտություն) դառնալու գաղափարը չի լքում նրան։
Սաբինայի երաժշտական նախասիրությունների ցանկը մեծ է` ռեփ, ռոք, ջազ, ռուսական էստրադա… Պատմում է, որ բոլոր նրանք, ովքեր լսել են իրեն, ասել են` դու կարող ես երգչուհի դառնալ։
«Նրանք իմ մեջ ամրապնդում էին իմ երազանքը, ասում էին` դու կարող ես», — պատմում է Սաբինան։
Ինչպես խոստովանում է Վանաձորի մանկատան տնօրեն Մարինե Դավթյանը, Սաբինան հասցնում է զբաղվել լրագրությամբ, թաղիքագործությամբ, նկարում է և պարում, սիրում է դաշնամուր նվագել, ու երբ սկսում է նվագը, բոլորը հասկանում են, թե ով է նվագում։
Մանկատան տնօրենն ու հոգեբանը խոստովանում են` Սաբինան հեշտ բնավորություն չունի, երբեմն բռնկվում է, բայց միևնույն ժամանակ սիրում է կյանքը։ Նրան բնածին առաջնորդ են անվանում, բայց աղջիկը հաճախ նեղանում է մյուսներից։
Սաբինայի նեղացկոտության մասին պատմում են նաև ընկերուհիները, սակայն խոստովանում են, որ նա շատ բարի է ու պատրաստ է իր «վերջին շոկոլադը» կիսել ընկերների հետ։
«Եթե երգչուհի դառնամ, համերգներ եմ կազմակերպելու, որպեսզի հավաքված գումարները փոխանցվեն մանկատանը, քանի որ գիտեմ` շատ երեխաներ օգնության կարիք ունեն», — ասում է Սաբինան։
