ԵՐԵՎԱՆ, 1 փետրվարի — Sputnik. Հայաստանում հիանալի պայմաններ կան դահուկասպորտի զարգացման համար, իսկ Ծաղկաձորն ու Աշոցք գյուղը լավագույն վայրերն են մարզվելու և առաջնություններ անցկացնելու համար։ Այս մասին Sputnik Արմենիա մամուլի կենտրոնում ասաց Հայաստանի դահուկային ֆեդերացիայի փոխնախագահ Գագիկ Սարգսյանը։
2016 թվականը բավական հագեցած է եղել ֆեդերացիայի համար. մի շարք միջոցառումներ են անցկացրել և հիմա էլ նորերին են պատրաստվում։
«Հաջողությանը նպաստել են նաև եղանակային պայմանները։ Առատ ձյունն այս տարի թույլ տվեց մարզվել և միջոցառում անցկացնել նաև Երևանում», — ասաց Սարգսյանը։
Հունվարի 13-17-ը Ծաղկաձորում անցկացվեց դահուկավազքի հերթական առաջնությունը։
«Առաջնությունն ընդգրկված էր միջազգային ֆեդերացիայի օրացույցում, և մեր մարզիկները կարողացան վարկանիշային միավորներ վաստակել։ Մեզ ուրախացրին հատկապես Միքայել Միքայելյանը, Թադևոս Պողոսյանն ու Սերգեյ Միքայելյանը։ Վերջին մարզիկն ամենալավ արդյունքը ցույց տվեց, և նա հավանաբար մի քանի տարի մրցակցությունից դուրս կլինի։ Վարկանիշային միավորները բավական բարձր էին, ինչը կնպաստի Կորեայում կայանալիք ձմեռային օլիմպիական խաղերի մասակցությանը», — ասաց Սարգսյանը։
Ինչ վերաբերում է կանանց, ապա ֆեդերացիայի ղեկավարի խոսքով` փայլուն ելույթ ունեցան Կատյա Գալստյանը և Աննա Մխիթարյանը։ Լավ արդյունքներ ցույց տվեցին նաև Աննա Ռաշոյանն ու Մարիամ Միքայելյանը։ Ֆեդերացիան մտածում է դահուկասպորտում ավելի մեծ թվով աղջիկների ներգրավելու մասին։
Սարգսյանը կարծում է, որ Հայաստանն ամեն տարի ավելի լավ արդյունքներ է ցուցադրում դահուկային մարզաձևում, և ֆեդերացիան փորձելու է միջազգային ավելի բարձրակարգ միջոցառումներ անցկացնել Հայաստանում։
Նա նաև պատմեց այն մասին, որ Աշոցք գյուղում գործարկվել է «Երեխաներին բերենք դեպի ձյուն» ծրագիրը։
«Այս գյուղն ավանդական վայր է դարձել դահուկասպորտով զբաղվելու համար։ Գյուղ ստացել է «հայկական Ֆինլանդիա» անվանումը։ Այստեղ հունվարի 9-ին տոնել են Ձյան համաշխարհային օրը։ Շատ հաճելի էր, երբ մեզ մոտեցան համայնքի ներկայացուցիչները, մասնավորապես` ուսուցիչները, և խնդրեցին հնարավորին չափ հաճախ անցկացնել ձմեռային միջոցառումներ, քանի որ տեղի բնակչությունն ունի դրանց կարիքը», — ասաց Սարգսյանը։
Այս կապակցությամբ Ֆեդերացիան Հայաստանի պետական ֆիզիկական կուլտուրայի ինստիտուտի հետ համատեղ տարբեր երկարատև նախագծեր է իրականացնում։
Սարգսյանը Sputnik Արմենիայի խնդրանքով խոսեց նաև Ալպինիզմի ֆեդերացիայի և Հայաստանի լեռնային զբոսաշրջության և հանրապետության դահուկային սպորտի ֆեդերացիայի միջև համագործակցության հուշագրի մասին։
«Այս երկու մարզաձևերն իրարից առանձին պատկերացնել հնարավոր չէ։ Ամբողջ աշխարհում լեռնային ձմեռային զբոսաշրջությունն արագ տեմպերով է զարգանում։ Մեր համատեղ գործունեությունը կօգնի զարգացնել երեխաների հմտությունները», — ասաց նա։
Սարգսյանը հայտնեց, որ Հայաստանի տարածքում երեխաների համար վրանային ճամբարներ են ստեղծվելու։
Նրա կարծիքով` սա թույլ կտա դահուկային սպորտով և ալպինիզմով զբաղվող երեխաներին փորձի փոխանակում իրականացնել։
Ֆեդերացիայի ղեկավարը նաև նշեց, որ Հայաստանի սկսնակ դահուկորդների շարքում կան մարզիկներ, որոնց խոստումնալից ապագա կարող են ունենալ։
