Արտեմ Ասատրյան
Սոցիալապես անապահով ընտանիքներն առ այսօր չեն ստացել հունվարի նպաստները: Ուշացման պատճառը մեկնաբանելով` ՀՀ աշխատանքի և սոցիալական հարցերի նախարար Արտեմ Ասատրյանը հայտնեց, որ այսօրվանից նպաստների վճարումը սկսված է: Ինչ վերաբերում է ուշացմանը, պարզվում է՝ պատճառը Նոր տարվա երկարատև արձակուրդն է:
«Հաշվի առնելով այն, որ այս տարի առաջին աշխատանքային օրը հունվարի 9-ն էր, այդ 7-8 օրվա աշխատանքը տարածքային կենտրոնները կատարել են դրանից հետո: Բոլոր գործակալություններն այս ընթացքում առավելագույն օպտիմալ ժամկետում իրականացրին բոլոր գործընթացները, որպեսզի քաղաքացիներն օր առաջ իրենց հասանելիք վճարները ստանան»,- ասաց նախարարը:
Նշենք, որ նպաստները, որպես կանոն, վճարվում են մինչև տվյալ ամսվա 25-ը:
