ԵՐԵՎԱՆ, 3 փետրվարի — Sputnik. ԱՄՆ նախագահ Դոնալդ Թրամփի կողմից վերջերս ստորագրված հրամանագրով վիզայի տրամադրման պահանջների որևէ փոփոխություն չի կատարվել ՀՀ քաղաքացիների և ՀՀ քաղաքացու անձնագրով դիմող երկքաղաքացիների համար ։ Այս մասին նշված է ՀՀ-ում ԱՄՆ դեսպանատան տարածած հայտարարության մեջ։
«Այդ հրամանագրով հարցազրույցի անցկացման հետ կապված փոփոխությունները ՀՀ-ում ԱՄՆ դեսպանատան կողմից կիրառվում էին մինչ այդ հրամանագիրը, և վիզայի ստացման գործընթացում փաստացի որևէ փոփոխություն չի եղել»,- նշել են դեսպանատնից։
Այն քաղաքացիները, որոնք ունեն վավեր մուտքի վիզա կամ ում մուտքի վիզայի վավերականության ժամկետը լրացել է առավելագույնը 12 ամիս առաջ, կարող են նոր վիզա ստանալ առանց հարցազրույցի, իսկ նրանք, ում նախորդ վիզայի վավերականության ժամկետը սպառվել է ավելի քան 12 ամիս առաջ, պետք է անձամբ ներկայանան և հարցազրույց անցնեն: Հարցազրույցի պահանջից կարող են ազատվել նաև դիվանագիտական և պաշտոնական մուտքի արտոնագրերի համար դիմած անձինք:
«Ինչպես միշտ, եթե դիմումը քննության առնելիս կամ դիտարկելիս հյուպատոսական պաշտոնյայի մոտ հարցեր առաջանան, ապա նա կարող է տվյալ անձին հարցազրույցի հրավիրել: Ընդգծենք նաև, որ վիզայի բոլոր դիմումների պարագայում, այդ թվում`այն դիմումները, որոնց դեպքում չի պահանջվում հարցազրույցի ներկայանալ, կատարվում է անվտանգության հետ կապված մանրակրկիտ ստուգում»,- ասվում է դեսպանատան պարզաբանման մեջ:
ԱՄՆ նախագահ Դոնալդ Թրամփը նախորդ շաբաթ հրաման էր ստորագրել, որի համաձայն՝ ԱՄՆ-ում 120 օրով կասեցվում է փախստականներին ընդունումը, արգելվում է սիրիացի փախստականների տեղավորումը անորոշ ժամանակով, խստացվում է Ամերիկա մուտք գործելու համար նախատեսված որոշակի կանոնները, ինչպես նաև 90 օրով կասեցվում է մուտքը այն երկրներից, որոնք առավելապես մուսուլմաններով են բնակեցված: Խոսքը Իրաքի, Իրանի, Սիրիայի, Սուդանի, Եմենի, Լիբիայի և Սոմալիի քաղաքացիների մուտքն արգելելու մասին է:
