ԵՐԵՎԱՆ, 3 փետրվարի — Sputnik. Հայաստանի մայրաքաղաքը զբոսաշրջիկին գրավում է հյուրընկալությամբ, համեղ խոհանոցով և ջերմությամբ, այսօր Sputnik Արմենիա մամուլի կենտրոնում ասաց Երևանի քաղաքապետարանի տուրիզմի բաժնի աշխատանքները համակարգող, Երևանի քաղաքապետի օգնական Մարիա Բարաղամյանը:
Պաշտոնական տվյալով` 2016թ-ին Հայաստանի մայրաքաղաքը հյուրընկալել է 1 259 000 զբոսաշրջիկի: Երևան այցելողները հիմնականում Իրանից, Ռուսաստանից, Ֆրանսիայից և Գերմանիայից են: Այցելուների թիվն ու աշխարհագրությունն ընդլայնելու համար քաղաքապետարանը համագործակցում է աշխարհի 50 քաղաքի հետ:
Քաղաքային իշխանությունն իրականացնում է նաև Կարմիր Բլուր, Շենգավիթ հնավայրերի, Վերնիսաժի տարածքի բարեկարգման և Երևանի կենդանաբանական այգու արդիականացման ծրագրեր:
Երևանի քաղաքապետարանի ներկայացուցիչը չի թաքցնում` մայրաքաղաքի կենտրոնում պատմական շենքերի բացակայությունը ևս խոչընդոտ է երևանյան զբոսաշրջության զարգացման համար:
«Բնականաբար, դա ցավոտ թեմա է, որը բոլորիս է հետաքրքրում: Այդ տեսանկյունից շատ կարևորում ենք «Հին Երևան» նախագիծը, որն արդեն հաստատված է, և որոշ հատվածներում արդեն թույլտվություններ են տրվել, հողհատկացումներ են արվել: Ես հույս ունեմ, որ ծրագրի իրականացմամբ փոքր կենտրոնում մենք կունենանք այն հիներևանյան գողտրիկ մթնոլորտը, տրամադրությունը, որը մեր քաղաք այցելած զբոսաշրջիկներին հնարավորություն կտա տեսնել, թե ով ենք մենք, ինչ պատմություն ունենք»,- ասաց Մարիա Բարաղամյանը:
Երևանը զբոսաշրջիկներին առավել մատչելի դարձնելու համար Երևանի քաղաքապետարանում խոստանում են առաջիկայում բարելավել նաև տրանսպորտային ցանցն ու վերագործարկել կանգառներում տեղադրված էլեկտրոնային ցուցանակները:
Այդ նպատակով հրավիրված բրիտանական խորհրդատու ընկերությունն այս պահին աշխատում է և շուրջ 6 ամսից կներկայացնի Երևանի տրանսպորտի նորացված համակարգը:
Տրանսպորտային խնդրից բացի, զբոսաշրջության ոլորտի ներկայացուցչի խոսքով, առաջիկայում Երևանի կենտրոնում կտեղադրվի նաև 6-7 բիոզուգարան: Բացի այդ, քաղաքապետարանը բանակցում է նաև Երևանի կենտրոնում տեղակայված սրճարանների սեփականատերերի հետ՝ իրենց տարածքի զուգարանները զբոսաշրջիկների համար հասանելի դարձնելու ուղղությամբ: