ԵՐԵՎԱՆ, 3 փետրվարի — Sputnik. Թուրք լրագրող, սյունակագիր, CNN-ի թուրքական ծառայության համախմբագիրներից Սերդար Քորուջուն Հայաստանի ծանոթագրությանը նվիրված բաժնի առաջին հոդվածում փորձում է ներկայացնել իրական Հայաստանն ու կոտրել թուրքերի և Թուրքիայում ապրողների մոտ հայերի մասին ձևավորված կարծրատիպերը:
Կայքի հատուկ բաժնում նա ներկայացնում է Հայաստանի և Արցախի տեսարժան վայրերը, տեղադրում սեփական լուսանկարներն ու մեկնաբանությունների միջոցով բացահայտում Հայաստանը:
«Յուրաքանչյուր թուրք, ով մի փոքր «մաքրել» է իր խիղճը, Երևանում խնդիրների չի հանդիպի։ Եթե դուք կարողանաք հաղթահարել ձեր գլխում եղած այդ փոքրիկ սահմանը, Թուրքիայի և Հայաստանի միջև դիվանագիտական հարաբերությունների հաստատումն այդքան էլ կարևոր չի լինի ձեզ համար», — գրում է Սերդարն ու շեշտում, որ անկախ պատմական դեպքերի վերաբերյալ սեփական կարծիքից՝ մարդկանց ցավը հարգելու պայմանն ամենակարևորն է Հայաստան այցելել պատրաստվող յուրաքանչյուր թուրքի համար:
Քորուջուն շատերի համար անհայտ Հայաստանը բացահայտում է սեփական ուշագրավ ֆոտոշարքերով:
