ԵՐԵՎԱՆ, 8 փետրվարի — Sputnik. Այս տարվա հունվարին Հայաստանի երկաթուղու համար կարևոր նշանակություն ներկայացնող մի շարք միջոցառումներ են տեղի ունեցել, մասնավորապես, Իրանից ժամանած գործարարների մասնակցությամբ կայացել է եվրոպական երկրներից Իրան և հակառակ ուղղությամբ մուլտիմոդել բեռնափոխադրումների իրականացմանը նվիրված հանդիպում-խորհրդակցություն:
ՀԿԵ գլխավոր տնօրեն Սերգեյ Վալկոն հայտնել է, որ նշված ժամանակահատվածում դիտարկվել է երկաթուղային բեռնափոխադրումների աճի դրական դինամիկա:
Բեռնափոխադրումների նախատեսվող ցուցանիշը կատարվել է 105,9%-ով, իսկ բեռնաշրջանառությունը՝ 106,5%-ով:
Երկաթուղով արտահանումն աճել է 9,9%-ով և 4,4 հազ. տն-ով գերազանցել է 2016-ի ցուցանիշը: Փոխադրումները տեղական հաղորդակցությունում նախորդ տարվա հունվարի հետ համեմատ ավելացել են 30%-ով:
Ընկերության ղեկավարը տեղեկացրել է, որ աճ է գրանցվել նաև մի շարք որակական ցուցանիշների գծով: Միևնույն ժամանակ,Սերգեյ Վալկոն արձանագրել է երկաթուղու աշխատանքի մի շարք ցուցանիշների կատարելագործման անհրաժեշտությունը: Դրանց թվում է բեռնատար վագոնի շրջանառությունը, էլեկտրաէներգիայի ծախսը:
Հունվարին կատարվել է նաև վագոնների վերանորոգման ծրագիրը. ընթացիկ վերանորոգում անցել է 21 վագոն՝ նախատեսվող 13-ի դիմաց:
Հաշվետու ժամանակահատվածում երկաթուղին սպասարկել է 1 060 գնացք, որից 1 050-ը՝ ըստ չվացուցակի: Չէր ուշացվել ոչ մի միջազգային ուղևորատար գնացք, իսկ ուշացումների ընդհանուր ժամանակը անցած տարվա հետ համեմատ կրճատվել է 37 ժամով: Վալկոն ընդգծել է չվացուցակի պահպանման ուղղությամբ տարվող աշխատանքների կատարելագործման անհրաժեշտությունը:
«ՀԿԵ» ՓԲԸ-ն հանդիսանում է «Ռուսական երկաթուղիներ» ԲԲԸ-ի դուստր ընկերությունը և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով:
