ԵՐԵՎԱՆ, 8 փետրվարի — Sputnik. Իսրայելի կառավարությունն ուշադիր հետևում է բլոգեր Ալեքսանդր Լապշինի գործին, որը ոչ միայն Ռուսաստանի, այլ նաև Իսրայելի քաղաքացի է, և կապ է պահպանում բոլոր կողմերի հետ, ՌԻԱ Նովոստիին հաղորդել է Իսրայելի ԱԳՆ պաշտոնական ներկայացուցիչ Էմանուել Նախշոնը։
«Մենք ուշադիր հետևում ենք պարոն Լապշինի գործի զարգացմանը և դիվանագիտական և հյուպատոսական ուղիներով կապի մեջ ենք համապատասխան բոլոր կողմերի հետ», — ասել է Նախշոնը։
Մինսկի ոստիկանությունը 2016 թվականի դեկտեմբերի 15-ին ձերբակալել է ՌԴ և Իսրայելի քաղաքացի Լապշինին, ով բնակվում է Մոսկվայում և գրում է ռուսերեն հեղինակավոր Travel Blog-ի համար: Նա Ադրբեջանի սև ցուցակում է հայտնվել 2011 թվականի ապրիլին, 2012 թվականի հոկտեմբերին և 2016 թվականի հունիսին Լեռնային Ղարաբաղ այցելելու, ինչպես նաև իր բլոգում Ադրբեջանի քաղաքականությունը քննադատելու համար: Ադրբեջանը 2011 թվականին նրան ներառել էր իր կողմից որոնվող անձանց ցուցակում:
Բելառուսի Հանրապետության գլխավոր դատախազի տեղակալը որոշում է կայացրել բավարարել Ադրբեջանի Հանրապետության գլխավոր դատախազության խնդրանքը՝ Լապշինին հանձնելու վերաբերյալ՝ Ադրբեջանի քրեական օրենսգրքի 281.2 և 318.2 հոդվածներով քրեական պատասխանատվության ենթարկելու համար։ Լապշինը բողոքարկել է դատախազության որոշումը, սակայն նրա բողոքը մերժվել է:
