ԵՐԵՎԱՆ, 10 փետրվարի — Sputnik, Լաուրա Սարգսյան. Այս լուսանկարն արվել է 2004թ.-ի նոյեմբերի 11-ին, Երևանի փախստականների համար նախատեսված կացարանում։ Լուսանկարի հեղինակը հայտնի ֆոտոլրագրող Գերման Ավագյանն է։
«Այդ ծեր կնոջը ես հանդիպեցի երևանյան կացարանում` նախատեսված փախստականների համար։ Նա ոչինչ չուներ, բացի որդու ու հարսի լուսանկարից։ Այդ ժամանակ նա մոտավորապես 70 տարեկան էր»,- Sputnik Արմենիայի հետ զրույցում պատմեց Գերման Ավագյանը։
Կինն այդ ապրել էր Բաքվում, իսկ որդին` ընտանիքի հետ` Գրոզնիում։ 1990թ.-ին, երբ Բաքվում սկսվեցի հայկական ջարդերը, նրան ծեծել, տանջել էին, ապա վտարել Կրասնովոդսկ։
Հետո նրան և այդ խմբի մնացած ծերունիներին, որոնք վնասվել էին ադրբեջանական խաժամուժի հարձակումներից, հայկական կողմը հատուկ չվերթով տեղափոխել է Երևան։
Ծեր կնոջ հետ ծանոթությունից հետո (ում անունը Ավագյանը չի հիշում), ֆոտոլրագրողը փորձել է օգնել նրան` ընտանիքի անդամներին գտնելու։ Լուսանկարիչը բազմիցս հրապարակել է այս նկարը տարբեր սոց կայքերում` հուսով, որ մի օր կհայտնվեն կնոջ որդին ու հարսը։ Սակայն, ապարդյուն։
Այդ օրից երկար տարիներ են անցել, երևի թե տատիկն այլևս չկա, բայց նրա ու իր ընտանիքի լուսանկարի մասին պատմությունը ֆոտոլրագրողը չի կարողանում մոռանալ։
Ավագյանը դեռ հավատում է, որ մի օր կհայտնվեն տատիկի հարազատները։ Ու եթե անգամ նրանց վիճակված չէր տեսնել իրենց մայրիկին կամ տատիկին, բայց միտքը, որ Հայաստանում նրանց միշտ սպասել են, կջերմացնի նրանց սրտերը։
