ԵՐԵՎԱՆ, 13 փետրվարի — Sputnik. ԱՊՀ միջազգային դիտորդների առաքելությունը հաղորդում է, որ Թուրքմենստանի նախագահի ընտրություններն անցել են առանց գործող օրենսդրության խախտումների, հաղորդում է ՌԻԱ Նովոստին։
«Դաշնության խորհրդի պատվիրակությունը` պալատի փոխնախագահ Իլյաս Ումախանովի գլխավորությամբ` որպես ԱՊՀ-ից միջազգային դիտորդ, այցելել է Թուրքմենստան` նախագահական ընտրությունների ընթացքին հետևելու համար։ Աշխատանքի արդյունքում ինչպես ռուսական, այնպես էլ արտասահմանյան միջազգային դիտորդների մեծամասնությունը համակարծիք էին, որ Թուրքմենստանի նախագահի ընտրություններն անցել են կազմակերպված և պատասխանատու` առանց գործող օրենսդրության խախտումների», — ասվում է Դաշնության խորհրդի մամուլի հաղորդագրությունում։
Ինչպես հաղորդել է Թուրքմենստանի ԿԸՀ ղեկավար Գուլմիրադ Միրադովը, Թուրքմենստանի գործող նախագահ Գուրբանգուլի Բերդիմուհամեդովը 97,69 տոկոս ձայնով հաղթանակ է տարել երկրում անցկացված նախագահական ընտրություններում: Ընտրողների մասնակցության ցուցանիշը կազմել է 97,27 %։
Թուրքմենստանի նախագահի ընտրությունները տեղի են ունեցել անցած կիրակի օրը։ 2016թ.-ի սեպտեմբերի 14-ին Թուրքմենստանում ընդունված նոր սահմանադրության համաձայն՝ ընտրված նախագահը կառավարելու է 7 տարի՝ նախկին 5-ի փոխարեն: Սա Բերդիմուհամեդովի երրորդ ժամկետն է։
