ԵՐԵՎԱՆ, 14 փետրվարի — Sputnik. Լեհաստանի ոստիկանությունը Վարշավայի մոտ գտնվող ծխախոտի անօրինական ֆաբրիկայում ձերբակալել է 8 մարդու, այդ թվում` Հայաստանի երկու քաղաքացիների։ Այդ մասին հաղորդում է ՌԻԱ Նովոստին` հղում անելով ոստիկանության մամուլի ծառայությանը։
«Մինսկ-Մազովեցկի ոստիկանները ձերբակալել են ութ մարդու, և նրանց սիգարետի անօրինական արտադրությանը մասնակցելու մեղադրանք են ներկայացրել։ Ձերբակալվածներից չորսին կասկածում են կազմակերպված խմբի կազմում հանցավոր գործունեություն ծավալելու մեջ։ Երկու կասկածյալներին` Հայաստանի քաղաքացիներին, հանցավոր խմբավորումը ղեկավարելու մեղադրանք է առաջադրվել», — ասվում է ոստիկանության հաղորդագրությունում։
Իրավապահների տվյալներով` ձերբակալվածների թվում կա Վարշավայի մեկ բնակիչ, Ուկրաինայի հինգ քաղաքացի և Հայաստանի երկու քաղաքացի։
Նրանցից երեքը ձերբակալվել են, ևս երկուսը (Ուկրաինայի և Հայաստանի քաղաքացիները) գտնվում են ոստիկանների հսկողության տակ, նրանց արգելվել է դուրս գալ երկրի սահմաններից։ ՀՀ քաղաքացիներին մինչև 10 տարվա ազատազրկում է սպառնում։ Ոստիկանական գործողության ընթացքում անօրինական ֆաբրիկայից առգրավվել է 10 հազար տուփ սիգարետ, պատրաստման սարքեր, ինչպես նաև 100 հազար դատարկ տուփ և 150 կգ թղթե ներդրուկներ։
