ԵՐԵՎԱՆ, 15 փետրվարի — Sputnik. Այսօր, Երևանի պետական համալսարանում ուսանողների հետ հանդիպման ժամանակ վարչապետ Կարեն Կարապետյանը, պատասխանելով ընտրացուցակների վերաբերյալ ուսանողներից մեկի հարցին, ասել է.
«Ինձ համար անակնկալ չէ, որ Հանրապետական կուսակցության ցուցակում չեմ: Կարող է` կա սահմանափակում, որին ես չեմ բավարարում»:
Իսկ ինչ է անելու ինքը խորհրդարանական ընտրություններից հետո հարցին, Կարեն Կարապետյանը պատասխանել է, որ եթե խորհրդարանական ընտրություններում Հանրապետական կուսակցությունը հասնի հաջողության և Կառավարություն ձևավորի, ինքը հույս ունի, որ ներկայիս թիմը կշարունակի աշխատել։
Հիշեցնենք, որ երեկ հրապարակվեց խորհրդարանական ընտրությունների մասնակցության ՀՀԿ համամասնական ցուցակը։ ՀՀԿ ընտրական ցուցակի առաջին տեղում Վիգեն Սարգսյանն է, երկրորդ տեղում` Երևանի քաղաքապետ Տարոն Մարգարյանը, երրորդը՝ արդարադատության նախարար Արփինե Հովհաննիսյանը: Հնգյակում են նաև պատգամավոր Արա Բաբլոյանը և մշակույթի նախարար Արմեն Ամիրյանը:
