ԵՐԵՎԱՆ, 22 փետրվարի — Sputnik. Թուրքիան Հարավային Կովկասում չափազանց ապակառուցողական դիրքորոշում է դրսևորում, նրա քաղաքականությունն ուղղված է տարածաշրջանի շահերի դեմ, ՌԻԱ Նովոստիին տված հարցազրույցում ասել է Հայաստանի պաշտպանության նախարար Վիգեն Սարգսյանը։
«Թուրքիան Հարավային Կովկասում բավական ապակառուցողական դիրք է բռնել. շարունակում է Հայաստանը շրջափակման մեջ պահել, մերժել Օսմանյան կայսրության իրականացրած Հայոց ցեղասպանության ակնհայտ փաստը, հրաժարվել է 2010 թվականին Ցյուրիխում արձանագրության տեսքով ստորագրած Հայաստանի հետ նորմալ հարաբերությունների վերականգնման միջազգային մակարդակով իր իսկ ընդունած պարտավորություններից։ Լեռնային Ղարաբաղի հակամարտության նկատմամբ ունեցած կանխակալ վերաբերմունքով Թուրքիան շարունակում է մեկուսացնել իրեն տարածաշրջանային գործընթացներից»,- ասել է նախարարը։
Թուրքիայի և Հայաստանի միջև բացակայում են դիվանագիտական հարաբերությունները, 1993 թվականից պաշտոնական Անկարայի նախաձեռնությամբ փակ է երկու երկրի միջև սահմանը։ Բարդ հարաբերությունները պայմանավորված են մի շարք հանգամանքներով, մասնավորապես Անկարան ղարաբաղյան հարցում աջակցում է Ադրբեջանին և սուր է արձագանքում Օսմանյան կայսրությունում 1915 թվականին իրականացրած Հայոց ցեղասպանության միջազգային ճանաչման գործընթացին։
